寄生虫入肠必须通过粪便传播　徐加晴崩溃 ：医生话我食咗“屎”

徐加晴今日（8/9）抱病出席港台“职安健常识问答比赛2018”。同场有歌手刘浩龙、郑俊弘、吴业坤、戴祖仪、菊梓乔等人参与。加晴表示较早时，同朋友去餐厅食错嘢。“搅到依家仲未好番，仲要覆诊睇医生食药，会不定时搅肚痛要去厕所，全面影响工作。”

病咗成个星期都仲未好番，追问之下，现实原来咁残酷，加晴一一道出真相，连佢自己都无法接受呢个事实。“当日同经理人、结他手一齐去咗湾仔食上海嘢，食完嘢之后，大家不约而同返到屋企都好头痛同不停肚泻，因为第二日要做嘢，咁我就不停咁食止泻药。到第二日做完嘢，顶到夜晚返屋企，我系屙到第二朝早上六点钟都喺个厕所度，顶唔顺入咗急症。之后医生报告出咗，话俾我知一个残酷事实，医生话：‘你唔系普通嘅肠胃炎，系寄生虫入咗肠，我做咗十几年都未见过呢个个案，可以咁讲俾你知，寄生虫唔会通过口水皮肤接触感染，喺必须经过粪便食用后，先至会感染到。’我听到之后完全崩溃，咁即系话我当日食𠮶餐饭，我系将带有粪便嘅食物食咗落肚，而家完全对食物都冇晒胃口，有好大阴影。”