郑秀文盼刘德华创伤后遗症早日复原：希望时间可以帮佢

郑秀文（Sammi）今日（4日）出席一个二手网站活动，捐出几件二手货品为慈善筹款，虽然数量不多，不过好快已经卖出去，反应好好：“我估有两个原因啦，第一就系上呢个网站买嘢嘅人都唔系好计啲嘢系咪最当季嘅，第二就系其实佢哋定价都系比我想象中平嘅。”既然个市咁好，Sammi也表示会考虑再捐，笑言在这之前自己已经买了多件复古首饰：“我甚至未去考究系几多年前嘅design，觉得靓就买。”作为明星，通常好多衣裤鞋袜、手袋等都只会用一两次就闲置，咁又真系有啲浪费，不过Sammi称现在好多服饰有赞助，着完之后就好似“灰姑娘”，12点就退还，反而她自己啲衫就会着好耐：“我唔介意重复，同埋过季嘅嘢对我嚟讲唔重要嘅，最紧要系你另外配搭啰。”

日前刘德华在演唱会记招上自揭堕马后有创伤后遗症，唔知Sammi有没有给好友啲意见呢？“咁我当然希望时间可以帮佢克服呢个恐惧症啦，始终咁恐怖嘅事，我谂发生喺我身上，我都唔多唔少会有啲阴影，咁希望佢慢慢喺呢个阴影里面可以复原啰。”讲到担任华仔演唱会嘉宾一事，Sammi则兴奋表示“如果华仔有需要，我绝对义不容辞！”

近排Sammi有同大家在Big Big Channel玩直播，难得参与此类活动的她受到网友热烈欢迎，Sammi也乐在其中，还直言可以尝试玩下其他范畴的直播：“我自己都有谂过嘅，不过未谂到直播啲乜，唔想因为直播而直播啰，我想𠮶啲内容系可以充实小小，同埋真系可以生活化小小。（同安仔生活的live？）咁又唔使生活化到咁，太真实啦。”