刘德华演唱会林嘉欣刘心悠齐点唱　古天乐拣歌劲偏门

刘德华红馆个唱将于12月开锣，早前信用卡预订廿场演唱会一日之内已全部售罄。唔止粉丝歌迷要扑飞，就连众多艺人都万分期待，当中包括古天乐、林嘉欣、卫诗雅、吴卓羲、颜卓灵、刘心悠、陈家乐、周秀娜、胡子彤、吴肇轩以及廖子妤，群星为了在今次演唱会可以听到心目中的好歌，都纷纷点歌，甚至大展歌喉，模仿华仔招牌动作唱腔瞓身演出。

华仔多年来唱过唔少经典金曲，一班“星级”粉丝都各有心水，好似林嘉欣最爱《如果我有事》：“可唔可以唱晒男女版呀？因为套戏真系好深刻又好好听，听亲都好似催泪弹。”另一位女神刘心悠就希望听到《忘情水》，仲曝露年龄秘密：“记得小学时一返到屋企，就将录音带放入机不停听不停听。”至于古天乐嘅心水就真系偏门啲啦，佢希望华仔唱《南音》：“《神雕侠侣》里面华哥做咗神雕大侠之后，其实唱咗首《南音》，大家可能无咩印象但我就好深刻，因为我都做过《神雕侠侣》嘅杨过呀吗，有亲切感。”

不得不提嘅仲有陈家乐，佢等咗多年终于同偶像刘德华合作，拍摄电影《扫毒2》，仲漏夜买底裤，将华仔嘅《暗里着迷》MV经典还原，由于华仔轮廓比较深，所以化妆时家乐会特别加深鼻骨同颧骨阴影，“放饭时间，妆都冇落，就咁除咗个假发就去食饭，食食吓，隔离台误认咗我系刘德华，劲开心，哈哈。”除此之外，家乐话最难忘系MV尾段淋花洒部份，“我哋系拍咗呢part先，因为预咗唔会一take过ok，所以团队都准备咗几套衫俾我替换，但我自己唔记得预备底裤，所以拍完淋花洒后，同事就要漏夜跑去便利店帮我买底裤，然后先可以落街拍，真系辛苦晒。”