【翔揸刘滩】娱乐圈三大吹水王开栋笃笑　誓要取代黄子华

邹凯光（滩叔）、彭浩翔及刘翁被喻为娱乐圈吹水王，三人今日（21日）聚在一起，宣布一件大事，三子将会举办栋笃笑，名为《翔揸刘滩之潮潮的吹》。三人笑言：“呢个计划想咗好耐，原本想搞上市公司，但发觉好大想头，所以先举办栋笃笑，然后再上市啦，呢个第一步几好，距离上市仲有一百步。”滩叔透露三人之中佢最有经验，因为曾经做过栋笃笑，“今次目的算叫做导人向善，今次加埋佢两个，咁会有比较，出嚟效果会知边个表现出来系好笑啲。”

今次栋笃笑三人扬言打筋斗、载歌载舞、变魔术系冇嘅，纯粹真系讲笑话。至于话题系围绕乜？刘翁抢先回答：“揾我一定系讲坏男人，咁坏男人好多唔同层面，咁我会讲讲点先可以做成功嘅坏男人，亦会讲下工作上遇到嘅骗案，变到成个Show系警讯。”而滩叔表示会讨论两性关系：“做咗咁多年男人，做过贱男，分享一下我做贱男嘅事，呼吁各位女性小心啲。”最后彭浩翔笑言自己冇补充，同佢哋讲嘅差不多。

今次三人栋笃笑只开两场，而三人圈内朋友十分多，会唔会大部份畀哂门票朋友？三人回应：“其实希望唔好请咁多圈内人，想畀多啲唔识我哋嘅人睇，因为只得两场，得千几个位，我哋想听下街外人对我哋嘅反应，睇可唔可以成功会有下一次嘅Show。”三人台上发布会时候笑言黄子华金盘啷口后，终于可以取代佢，访问中问到呢一个问题，翔浩翔坦言：“其实我哋都好想佢继续做，只不过宜家等到佢退休，我哋可以容易Book场，加上我哋做得差嘅话，佢可能会想复出打救呢个行业呢。”