孙慧雪产后修身成功再影写真：三管齐下2个月见效
以前结咗婚生小朋友，即使唔做主妇相夫教子，事业上都少有再搏杀，扮靓嘅日子更加系一去不复回。孙慧雪话晒系宅男女神，但去年结婚怀孕，孕肚巨到好似陀孖胎一样，BB出世后要喂人奶又唔可以过份节食。但雪雪身体力行话俾大家知：“世上无丑女人只有懒女人”三管齐下怒减27磅，呢日仲再披战衣影写真，Fit到不禁令人质疑系咪婚前影落架﹗雪雪即时扮嬲话：“寻日影架﹗不过多谢你，证明有成果哈哈﹗”
孙慧雪43吋巨肚惹双胞胎疑云 8月生得：BB太巨型可能要开刀
5号夜晚忽然见到阿雪上载一张新相，扎起丸子头著住白色lace Bra Top少女味浓。之前阿雪出席活动时仲有啲肉地大呻要努力修身，原来默默努力已经有成果﹗阿雪接受香港01访问时笑言：“呢张相寻日影完即晚收到即刻Po，呢排都好俾心机减肥，由生完147减到120磅，比生B前仲差5磅左右。”
新手妈妈就算有工人帮手，落力照顾小朋友，都无咩时间再扮靓修身，阿雪都话自己曾经Hea过，减肥永远得把口：“因为8月中开剧，之前有段时间得个讲字，到要拍剧有人个目标就可以下定决心。成个起居饮食生活习惯都要改变，饮食要节制，宜家有个Personal trainer教我用健康方法减磅，另外有扎肚，因为生完BB盆骨阔咗，三管齐下效果真系明显啲。呢两个月先真正俾心机落力减，落咗超过十磅。新手妈妈畀心机呀﹗真系只有懒女人无丑女人架﹗”
忽然出现呢张靓相，加上之前书展阿雪都有到场，不禁令人联想起修身成功会唔会再出一本留念呢？“书展时其实好多人INBOX我之前本写真有无得补购，本身讲过无唯一一本，绝版就由得佢绝版做回忆。不过实在太多人问，司徒夹带都有同我倾过要唔要影多本，自己都谂始终做咗妈妈，大家仲会唔会想睇，出一本健康性感，鼓励下新手妈妈生完都可以继续靓。”
话就话最紧要影出嚟靓，不过已为人妻人母，拍摄尺度都要谂下另一半介唔介意嘅。阿雪呢几张相主要露腿同少少事业线，原来啲衫系佢老公帮手拣架：“本身都有啲紧张，生完BB后都无影咩靓相，今次算第一辑相，到底影咩造型，著咩衫好呢？老公完全无问题，觉得靓就可以，仲笑住话你终于返去以前靓嘅时候个状态啦﹗”