【中国好声音】四导师争一学员　谢霆锋使横手除衫骚肌抢人

明知欲望无限但选择有限，但人总系贪心希望得到更多更好。谢霆锋于《2018中国好声音》担任导师，第一集已经率先够筹收满6位学员，不过佢又惊错过咗自己钟意嘅声音，所以就算自己𠮶组已经full house，但第2集都继续同其他导师抢人，仲keep住“快、狠、准”嘅拣人风格。

继第一期有学员唱咗《黄河谣》二秒，霆锋就即刻㩒掣转身，将佢收归旗下后；今次选手邓紫霄就选择唱番导师谢霆锋嘅《因为爱所以爱》，虽然学员唱自己歌，但霆锋听到最后一秒先㩒掣转身，霆锋同学员讲：“选曲唔系太啱，但声音打动咗我。”最后仲俾咗第二次嘅演唱机会佢。

除此之外，另一位学员李佳丹唱完后，四位导师都争崩头要人，霆锋更不惜使“横手”，喺呢位职业系健身教练嘅学员面前，大晒粗壮结实嘅麒麟臂线条，从而得到共鸣，动手又动口，之后佢又出口术，表示自己已经开始为学员编曲，为嚟紧嘅比赛做准备，“你嘅音乐风格更适合留喺我𠮶组。”最后霆锋嘅真诚同尽责深深咁打动咗呢位学员，加入咗霆锋嘅战队。