郑嘉颖陈凯琳结婚？ 乐小姐：Grace同嘉颖啲兄弟都请晒假
撰文： 黄欣华
出版：更新：
郑嘉颖与陈凯琳拍拖三年，有传下月12日将会在峇里拉埋天窗，更有人爆料指陈凯琳由妈咪陪同下做产检，疑似双嘉临门。无线高层乐易玲今日〈25日〉出席《宫心计2深宫计》祝捷晚宴时，被问及此事，都有作出回应。
【独家】郑嘉颖陈凯琳真系双喜临门 读者报料：已经做咗三次检查
乐小姐指：“其实早几个月之前，Grace就请假，我哋都批咗，系个好短嘅假期嚟嘅。我哋果阵大家都觉得佢系帮嘉颖庆祝生日，我依家都唔知佢系去结婚定庆祝生日。”乐小姐虽然唔清楚嘉颖同Grace究竟系结婚定庆祝生日，但就透露唔止Grace向公司请假，连他们相熟嘅艺人都有向公司申请假期：“咁我都见到嘉颖有好多好朋友、好兄弟，同佢合作多年嘅艺人都有请假，不约而同都系𠮶段日子，可能佢真系去庆祝生日嘅。”
成大班人特登请假帮嘉颖庆祝？记者梗系唔信，所以继续追问Grace系咪有咗BB，乐小姐就话：“我又唔觉㖞，我见过佢又见佢乜嘢都无㖞。我问过佢，啲同事又问过佢，Grace都话唔系呀！”至于会唔会买礼物俾嘉颖做生日礼物抑或新婚礼物，乐小姐就话暂时未谂，仲透露嘉颖喺大陆拍完剧就会约佢同Grace出嚟倾下。
对于最近有传乐小姐花880万买楼，乐小姐就坦言确有此事：“楼花咋！有排都未洗俾钱，我都系帮屋企啲细路。〈投资?〉帮下手，帮佢哋上车啫，等佢哋读书等佢哋自己供！”