《深夜美食团》黄恺怡自嘲唔识食好西　最想挑战拍写真

黄恺怡（Jasmin）今日（24日）下午时份出席由佢主持嘅综艺节目《深夜美食团》记者会，记者会期间Jasmin更与余思霆大显厨艺，不过小编见到佢哋煮嘅炒饭望到都惊，因为佢哋不停将调味料加落去，可想而知有几恐怖。问到啱啱炒饭都有少少鸡手鸭脚嘅情况发生，Jasmin唔觉得自己煮得唔好，仲觉得几好，更反问记者觉得点，“我知道监制佢哋钟意重口味，所以我疯狂落盐及豉油等，你未试过所以唔知道系好食，不过今次的确系第一次煮炒饭。”对于厨艺方面Jasmin直言煲饭比较多，今次系第一次炒饭。

讲番今次节目一众主持四处寻觅极品美食介绍畀观众，Jasmin自己都十分喜欢食呢件事情，不过佢自问自己就唔系一个食得好“刁钻”嘅人，“譬如话卖八头鲍嘅鲍鱼，卖万几银，可能我觉得唔系最好食，反而我食啲饺子先觉最好食，所以佢地都会话我唔识食。”对于不停食食食嚟讲Jasmin已经有少少内疚，因为食肥咗，不过佢直言唔怕肥，“都要减肥嘅，唔肥又点减呢？打拳减肥啦。”

近年一直做主持嘅Jasmin累积咗唔少做主持嘅经验，曝光率亦多咗，但佢自己觉得仲有好多不足之处，“其实今次拍呢一个节目主持有张秀文同崔建邦佢哋，佢哋真系经验丰富，所以系佢哋身上学到做主持嘅经验。”亦问到除咗做主持之外仲会想尝试边方面工作？Jasmin透露想拍剧外仲讲咗一件事情想做，相信大家都估唔到，“下年又做下KOL又或者影写真啦”原来Jasmin指嘅写真，系影一啲文青少少嘅生活照，简单来讲其实系图文集，想挑战做才女，“如果自己真系出写真嘅话，惊大家睇咗会反胃。”