【金管局实测】赌戏入面嘅“箧”究竟装到几多钱　电影原来有错？

讲起旧时香港电影，“赌”片一定走唔甩，周润发《赌神》系列，到刘德华嘅《赌侠》，再到周星驰领军嘅《赌圣》，套套都系经典之中嘅经典。除了一贯紧张、快上快落嘅剧情之外，赌台上点样运用各种能力或者计谋去赢对方，都系“赌”片入面嘅精髓。而系赌台上，赌具当然系重要，即系赌啲乜。其次就系钱，无钱就要赌筹码，睇落个气势都争咁截，而啲钱唔系少少咁拎出嚟，有睇过都知，啲主角系钟意成箧钱拎出嚟倒喺台，咁先叫气势呀嘛！

通常装钱𠮶个箧，钱一定唔会少，闲闲地都有二、三千万喺入面，其实究竟系咪真系可以放到咁多钱入去呢？香港金融管理局在今日发布了一条影片，内容就系讲成日喺戏入面见到嘅箧，究竟放到几多钱入去，仲有唔单止箧，连红白蓝袋都有进行测试。片段中所见，原来一个箧只系可以装到五千张一千蚊纸，即系五百万，不过电影入面好多时都唔系用港纸，所以又唔可以话系错。而至于红白蓝袋，塞满佢系可以袋到七万张一千蚊纸，即系有成七千万！唔怪得戏入面嘅大贼成日拎红白蓝袋。