【开心速递】张景淳重返剧组　同长脚蟹再续前缘：要有啲暗恋感觉

张景淳之前于《爱·回家之开心速递》入面饰演龚烨一角令人印象深刻，不过却因为另有工作安排而要离开剧组，令到观众同网民都好唔舍得，景淳自己亦好唔舍得。今日该剧举行活动宣布再添食180集，他亦有出席，并正式宣布重返剧组。景淳表示：“系啱啱添食前返嚟嘅，已经拍咗几集，公司想保持神秘，所以之前唔讲得，第几集出场都唔讲得住，希望大家留意每一集，总之暑假会出场，如果系粉丝就一定会知嘅。”

他指自己之前因为要拍《铁探》加上有其他工作而要离开剧组，今次回归会继续饰演龚烨，延续同熊尚水 (吕慧仪饰) 的感情线。景淳说：“之前我走，大家都觉得好突然，好开心知道网民都想睇呢个角色，我一直想入返剧组，自己都有表示话想返嚟，监制同编审佢哋亦都有呢个意思。今次再演呢条线有啲难度㗎，之前习惯咗同阿蟹 (吕慧仪) 斗，依家就要由朋友开始，兼又有啲暗恋嘅感觉，要揣摩下，我每日都喺度揣摩紧。”据知张景淳离开《开心速递》一集，是该剧收视历史新高，故今次监制找他重返剧组，似乎有意再创收视成绩㖞！