薛家燕娶新抱个个著“褂皇”系咩玩法？ 非为抢镜只系跟足传统
薛家燕娶新抱好似华人界嘅盛事一样，事前大家都期待佢会唔会再著“龙袍”现身饮新抱茶。6月11号石耀庭同ZOE终于圆婚，家燕姐件龙袍就唔见影啦，婚礼相片一样睇到大家哗哗声，除咗好似无限手套咁大嘅立体龙凤鈪好吸晴之外，家燕姐同新抱仔著上9成9相似嘅裙褂，仲有一张大合照有成8个著裙褂嘅家人，都令大家不禁笑问：“到底边个先系新娘呀？”呢次为婚礼制作中式礼服嘅老字号绣庄负责人黄国兴师傅就话：“大家喺度计个婚礼用咗几多百万，其实忽视咗净系裙褂都已经过百万啦。”
大家平时去婚礼通常只见到新娘子著裙褂，今次足足7位长辈著裙褂难怪令人疑惑，黄师傅就话：“其实六七十年代香港嘅婚礼，大户人家富豪婚礼，长辈系全部都会著上“褂皇”，系身份嘅象征，系香港以前嘅风俗传统。家燕姐嘅姐妹可能比较早期移民，佢地停留喺以前婚礼长辈都会著裙褂嘅观念，其实只系跟返传统。”网友误会家燕姐抢镜，其实应该多得佢令新一代认识呢个传统。
“褂皇”到底系咩嚟？裙褂其实有好多款，大致上以金银线密度分为小五福、中五福、大五福、褂后、褂皇，当中褂皇嘅金银线密度高达100%，传统上全人手制作每件要用上十多个月制作而成架。90年代起香港新人开始只著西式礼服，令裙褂一度息微，直至09年杨千嬅结婚时，著上“褂皇”拍摄嘅婚照，令大家重新认识中式传统之美。
“今次帮家燕姐佢地订造咗8件裙褂，包括新娘子、家燕姐同佢4位姐妹，外母以及新娘婆婆，加埋超过100万，其中有6套系属于“褂皇”，传统上系应该大家一式一样。不过呢次设计上我地花咗少少心思，好似家燕姐身上𠮶件，内层布料系金色，而新娘子系用咗大红色；家燕姐4位姐妹嘅裙褂，祥云系用上白色做主色，大合照时就会睇出有啲层次。”
黄师傅话依家都有唔少港人结婚，会租埋裙褂俾家中长辈穿著，妈妈裙褂都可以系褂皇，只系依家普遍香港人租裙褂时，长辈可能唔想抢新娘子镜，就会拣无咁多金银线嘅裙褂，简单嚟讲60岁以下奶奶外母通常著枣红色，60岁以上婆婆辈就通常拣红黑色。