【开心速递】周嘉洛对镜练演技 演金城安向黎耀祥偷师
“我唔惊被定形，我已经被定咗形啦。”周嘉洛说。无线处境剧《爱‧回家之开心速递》已经播出了超过330集，在剧中饰演金城安的周嘉洛演技自然流畅，形象健康又入屋。不过金城安呢个角色愈是深入民心，周嘉洛也就愈容易会被定型，那么他自己又惊唔惊呢？对此嘉洛说,：“唔惊，我已经定咗形啦，件事已经发生紧，无得惊㗎。之前做《八时入席》饰演余日潼做咗成200几集，到拍《开心速递》演金城安初时都会有余日潼嘅影子，有啲演绎方式习惯咗，需要花啲时间去摵甩。如果第时完咗《开心速递》去拍其他剧，我就会投入另一个角色，亦会有唔同嘅演绎方法，自然就唔会再系金城安。”原来这样的情况嘉洛早已经历过一次，难怪他有信心可以应付得来。
嘉洛由最初入行至今，有逾大半时间都在拍处境剧。行内人都说做处境剧会令演员进步得好快，嘉洛亦有同感：“真系不断咁练习，每日拍摄每日睇返系会进步得快啲。经过呢3年时间，自己作为演员更加认清咩系演戏，演戏系好广阔嘅范畴，我算系进入咗度门喇。自己以前系一旧饭，依家就系一个BB，仲有好多嘢要学习，仲有好多位做得唔好。我觉得自己嘅强项系演得比较自然，弱项就系演感情戏，因为自己经历得唔多。”
他坦言现在睇返自己以前所演的戏都会毛管戙：“真系睇到起鸡皮，以前竟然觉得演得几好。依家系有进步嘅，技巧有提升，但演技仍有不足。我有对住块镜练习演戏㗎，作为演员对自己嘅表情理解好紧要，我重点会对住块镜睇住自己个样嚟揣摩，想表达𠮶个情绪嘅表情，要系观众get到嘅，呢方面仲要慢慢练习。”
想学多啲嘢，向前辈不耻下问绝对是一个好方法，嘉洛认为做演员某程度上要面皮厚：“我承认自己喺某啲事情上系厚面皮嘅，当然我会知道底线。演戏唔可以有太多顾虑同包袱，遇到唔识嘅嘢又或者对自己演技无信心嘅时候，就多啲问前辈，我通常会问彤爷 (刘丹)、豹哥 (单立文)、阿滕 (滕丽名) 、马贯东同阮政峰佢哋。佢哋都好好，好帮我肯畀意见我，会同我分享佢哋嘅经历，令我从中得到好多启发。”
嘉洛之前拍《八时入席》时，视帝黎耀祥亦教了他很多：“祥哥唔会直接教我要点样去演，而系会同我讲好多开导嘅说话，等我自己去消化同理解，从而揾出适合自己嘅演绎方法。” 至于可会睇前辈演戏来偷师？嘉洛说：“梗系会啦，偷师系基本嘢嚟，我依家处于观察模仿嘅阶段，会将人哋𠮶套用喺自己身上，再去摸索点先啱自己。演戏无嘢系容易嘅，对我嚟讲每一个步骤都系挑战。”
嘉洛坦言一直以来可以跟咁多前辈合作，学习兼偷师，自觉非常幸运，暂时他的演艺路也算平坦易行：“自己系处于一个好幸福、好幸运嘅状态，完全系喺一个温室里长大，无经历过风雨嘅磨练，系一只无受过伤嘅小绵羊。训练班毕业之后半年左右就收到通知可以拍《爱‧回家》，由《八时入席》到《开心速递》嘅角色都好入屋，编剧写得好贴地。”
讲到金城安令观众同网民最难忘的一场戏，应该是他被饰妈妈熊尚善的滕丽名左加开弓掴了14巴的一幕，不少人睇到呢幕都戥他惨，隔住个芒都Feel到痛。不过嘉洛却认为好好玩：“呢场戏系一shot落，虽然我皮薄但系唔痛嘅，因为阿滕好专业，佢唔系下下都真系打落去，有啲系借位同借力，大家都睇唔出呢。阿滕同我之间有好多互动，令到观众好记得我哋嘅戏，亦都令到金城安个角色更上一层楼。”
摄：陈顺祯 场地提供：铜锣湾迷你酒店