【深宫计】米雪客串3分半钟观众未够喉：拍紧《溏心3》冇时间！
撰文： 陈栢宇
出版：更新：
《宫心计2深宫计》第1集最好睇的部分，一定是第一节中饰演韦后的米雪姐在大殿上洒溪钱后被马浚伟、马国明合力诛伏一幕。虽然客串演出的米雪姐出场时间得3分半钟，但她的出现就令到整集气氛提升不少，引观众继续想睇落去，而米雪姐本身亦演得出韦后的霸气。好多观众都觉得米雪姐出现时间太短，好唔够喉，她接受《香港01》访问时就话因为当时正拍摄《溏心风暴》，所以好难腾出时间拍摄更多场口：“好多谢监制梅小青同TVB特登写呢场戏畀我。”
至于该场是否拍摄得好辛苦？米雪姐就指虽然出街得3分半钟，但当时拍了足足30多个钟：“由朝头早拍到第二朝，食完早餐，再食埋晏，先至拍完。系好开心嘅，有一场咁精彩嘅戏㖞。”她又指《深宫计》拍得非常认真：“大家有冇留意第一个Shot，我一路洒溪钱，佢就好远咁一路Zoom埋嚟，呢度试咗成两个钟，所以拍出嚟大家都话好睇，因为有个深层次喺度。”
好多观众都觉得《深宫计》对白用字艰深，但米雪姐就觉得对白不算难记：“拍得花时间都系灯光、走位上，好认真，我叫观众唔好眨眼，每一个镜头都系戏，每一个镜头都好靓，我自己都好钟意。”而她又笑指自己最喜欢吊威吔部分，因为可以飞来飞去。