【飞虎之潜行极战】泽囝扮女人扮上瘾　对住三哥扁嘴卖萌

《飞虎之潜行极战》今晚播出第9集，饰演O记警司聂宇航嘅苗侨伟(三哥)成功截获情报箱，但系就被恐怖份子社团U384狙击顾兼插赃嫁祸，被黑白两道追杀。喺逃走嘅时候，三哥就同饰演飞虎队成员嘅黄宗泽表明立场话要自己查清真相，最后泽囝就跟埋三哥走。当两人商讨紧下一步应该点做嘅时候，三哥就拎住件女装外套，叫泽囝著起佢……

下一幕就见到化晒妆嘅泽囝著住件粉红色外套戴住假髪，挠住三哥只手行街。泽囝仲不时扁嘴卖萌，𠮶张红色嘴仔好诱人，原来泽囝扮起女人上嚟都几有feel。讲返剧情，到底点解要泽囝扮女人，就咁避开监视嘅话，好似三哥咁戴帽同著得低调啲都可以。究竟系要避开剧中最强劲嘅动态识别程式？系纯粹想加插一个搞笑位落去畀泽囝“发挥”吓，定系泽囝扮女人扮到上咗瘾呢？

其实喺泽囝嘅演艺生涯入面唔系第一次扮女人，佢喺剧集《我的野蛮奶奶》同电影《刑警兄弟》入面都扮过女人。唔知系泽囝都觉得自己扮女人好睇，早排佢喺Instagram post晒过往扮过女人嘅造型出嚟，仲问网民意见边个look最正。睇嚟泽囝都几enjoy扮女人！