《宫心计2深宫计》周秀娜变隐形人　TVB周刊介绍只得7个字

无线重头剧《宫心计2深宫计》今晚首播，上星期剧中所有演员都有出席记者会宣传，唯独是主角之一饰演郑贵妃嘅周秀娜完全唔见影，连布景板同最新官方trailer都冇得出镜，因为佢所属嘅萧定一经理人公司，最近同无线有官司纠纷。虽然《宫心计2深宫计》总监嘅梅小青指娜姐嘅戏份冇被删减：“一句对白都冇Cut！”，但所有宣传，娜姐统统隐形，记者会布景版，冇样！宣传海报原本影晒，执走！就连周日（5月20日）出版嘅新一期《TVB周刊》入面，就算摷到烂，都揾唔到娜姐个样，大台“封杀”果然做足全套。

最新一期TVB周刊就系以《宫心计2深宫计》角色造型做封面，望落去，似唔似粤剧Show啲宣传海报呢？

讲番个封面，艺人方面就有胡定欣、刘心悠、马浚伟、马国明、萧正楠、陈炜、黄心颖、米雪、谢雪心、罗霖、康华、张慧仪、张文慈、韩马利、李龙基、吕珊、李美慧，但就系冇周秀娜。

再睇得仔细啲，成本《TVB周刊》有154页，当中20页系解构《深宫计》嘅内容同埋角色背景同埋艺人访问，完全揾唔到娜姐，几经辛苦，揭到去第102页嘅足本剧情，终于揾到娜姐个名，得一行、7个字“郑纯熙：周秀娜饰”，连细图都冇出现过娜姐个样，惨！又难怪娜姐日前出席活动嘅时候，都讲过觉得好可惜，同时又感到无奈，而家可以做嘅只能够喺自己个人社交平台宣传吓套剧咁啰……