【24K Magic World Tour】Bruno Mars开骚入场必听5首歌

Bruno Mars上个月开始咗亚洲巡回演唱会，首先喺日本举行首站，将演唱会变成一个大型复古R&B party，佢充满张力嘅唱功同超凡嘅舞技令所有歌迷high爆全场。讲到亚洲巡唱，点会少得香港站，佢相隔4年再次袭港，喺今个星期六、日喺亚洲博览馆举行两场演唱会。今次以《24K Magic》为主题，当然要听熟先好入场，依加就挑选5首Bruno Mars嘅歌同大家热个身！

Finesse

呢首个真系唔讲得笑，Bruno Mars仲揾到Cardi B featuring，推出之后就创下美国电台播放率最高嘅歌！之前喺第60届格林美颁奖典礼上表演跳唱《Finesse》，强劲嘅节奏一响起前奏就已经令到全场歌手企晒企身欢呼，而MV亦喺网上疯传，点击率更高达4忆，我一听到就想跳舞喇！！！

That’s What I Like

呢首歌真系唔听唔得，除咗系专辑入面嘅主打歌，相信就算唔系Bruno Mars嘅歌迷都识唱，早前Bruno Mars喺格林美颁奖典礼上凭呢首歌仲夺得年度歌曲，赢埋同样好hit嘅《Despacito》。另外，喺旧年Brit Awards上面Bruno Mars亲自演绎呢首歌，无论唱功同舞技都超晒班，好带动到现场气氛！

24K Magic

作为一个流行歌手除咗要迎合大众口味嘅同时要建立个人风格，而Bruno Mars就绝对做到呢一点。《24K Magic》呢首歌充满住复古味，将60至80年代嘅disco funk音乐精华以流行音乐嘅形式呈现出嚟，绝对系必听之选！

Versace On The Floor

听完几首快歌之后，听返首抒情主打《Versace On The Floor》啦！呢首可以话系我全只专辑入面最钟意嘅歌，funky完都要抖抖，转听吓浪漫电音，细心听埋啲歌词真系冧晒，好听到转埋做电话铃声！再睇返旧年Bruno Mars喺Billboard Music Awards嘅现场演绎，𠮶啲超高音同难到一个点嘅转音，绝对唔系普通人可以唱到！

When I Was Your Man

逝去的爱总带著遗憾，而《When I Was Your Man》就唱出错过最爱嘅𠮶种痛苦，同时悔恨回忆中嘅美好。成首歌只只系得简单嘅钢琴声，同Bruno Mars充满情感嘅歌声，直接唱到入心坎里，听到个心乸住乸住。