【康城影展2018】范冰冰七度现身红地毡　眼利网友发现P图痕迹

又到一年一度影坛盛事，第71届康城影展正式开幕，各地影星先后飞抵当地作准备，范冰冰亦都第7次踏上康城红地毡，为有份参演嘅荷里活电影《355》宣传，不过由抵埗到去红地毡上，都发生一啲令冰冰颇为滴汗嘅事。

范冰冰一身休闲打扮，自己推住行李现身法国机场准备出席康城影展，戴住白色头带、附有长炼嘅太阳眼镜，白TEE牛仔裤长身西装褛配以黑色高跟鞋，同一贯具气势打扮有唔同感觉。见到唔少FANS到场接机冰冰都好亲民逐一签名，点知尴尬嘅事发生啦，其中一位外国粉丝递上靓相拎签名，不过相中人就唔系范冰冰而系李冰冰，可以见到一直狂签嘅范冰冰望一望然后定格，拎笔只手慢慢移开继续帮其他FANS签名，睇嚟喺外国人眼中依然系︰“点指冰冰点睇都分不清”。

离开机场去到行红地毡，范冰冰换上一条Ali Karoui高级订制嘅粉绿色蛋糕裙，相当抢眼。作为红地毡常客范冰冰熟练地转换POSE俾现场记者影相，不过眼利嘅网友就发现，冰冰自家工作室发嘅靓相，对比媒体照片来说，手臂位好似有重点修图，虽然未发生背景P图P到歪咗嘅问题，不过艺人PO相前要美图应该是常识吧。