Gordon哥哥萧徽勇瘦咗3个码　究竟靠乜可以喺1个月内激减40磅？

好多人都话减肥系女人嘅终身事业，但其实计我话减肥系所有人嘅终身事业。大家记唔记得萧徽勇﹝Gordon﹞？佢做过DJ、配音、主持人等工作，但最为人熟悉就《放学ICU》嘅哥顿哥哥，之前喺剧集《实习天使》所演嘅智障角色再为观众所认识。不过最近Gordon就喺Big Big Channel开live表示挑战蔬果汁断食大挑战，瘦咗好多，由直逼300磅减到200头，虽然未变到瘦仔，但都由XXXL变到XXL，成绩叫咗大跃进！

Gordon接受《香港01》访问时，透露自己减磅原因，事缘系去年5月因为身体出现问题而入医院：“起初系因为胃痛，然后做身体检查就发现高血压，血糖指数都OK嘅，但系血压上压过咗200，系去到有机会中风同死唔死之间，所以要正视呢个问题而决定减磅。”一开始减肥就系隔日做gym，做重量同带氧训练，个几月就减到十几磅，不过Gordon就笑言自己本身都差唔多300磅，就算瘦咗十几磅人哋睇落都冇乜分别，持续由去年7月开始到4月就减咗40磅，不过当身体习惯咗个模式就开始进入樽颈位，磅数就开始停滞不前，然后开始转用另一个方法去减肥，就系蔬果汁断食法。究竟有几神奇，以下落嚟就教大家点整啦！

Gordon就公开蔬果汁断食餐单，其实做法好减单，就系预备唔同配搭嘅蔬果，然后用榨汁机榨成果汁。

第1日嘅早餐就集中选用绿色蔬菜，例如西芹、青瓜、柠檬，再加适量嘅姜同欧芹。午餐就可以拣红色蔬果，就好似萝卜同红苹果，如果下午茶觉得肚饿，就可以红绿蔬果配搭，将蕃茄、橙加西芹同青瓜，再落适量姜同欧芹。而晚餐就简单啲，苦瓜同梨就OK喇！

其实第2日同第1日嘅饮用方法都差唔多，不过可以再拣选唔同嘅蔬果配搭，例如香蕉、苹果、羽衣甘蓝、菠菜咁，如此类推。唔好以为呢个蔬果汁好难饮，其实味道都唔错，不过因为原理系等肠胃“放假”，所以有时都会觉得肚饿。如果大家返工觉得唔方便榨汁，可以选择早餐喺屋企饮1次，放lunch𠮶时可以去果汁店买五青汁饮，晚餐就返屋企榨汁，最紧要坚持！

唔食嘢斋饮果汁减肥真系得？Gordon话畀大家知，真系得！其实呢个蔬果汁断食法就系Juice Reboot，系Gordon一个之前喺澳大利亚电台前同事介绍嘅，源自澳大利亚一个叫Joe Cross嘅企业家。讲到过程辛唔辛苦，Gordon话：“初头都系抱住半信半疑，硬住头皮嘅心态去试。第1日就冇咩嘅，因为身体入面都仲有食物可以消化，但系第2日就好难顶，时间过得好慢。其实系心理影响好大，感觉好失落，个人好似冇力咁，又唔够饱。”Gordon直言去到第4同第5日就开始排毒同宿便，排完一身轻：“饮咗蔬果汁1个星期肚腩细咗80%，效果等于做咗8个月gym嘅磅数，真系好明显喺短短29日就减咗40磅！”除咗减到肥，Gordon仲话改善到睡眠质素，连患咗10年嘅睡眠窒息症都改善埋，个人精神好咗，体力好咗，连皮肤都好咗啊！