【流行经典50年】关心妍唱《讲不出声》　网友：同关菊英出合唱版

唔少女士本身事业发展一帆风顺，为咗生儿育女决定急流勇退，将时间心机放晒喺小朋友身上，关心妍就系其中一个好例子，16年中诞下囡囡杨荣心后，Jade工作量大减专心相夫教女，以及出席慈善活动。呢日佢终于再亮相无线节目《流行经典50年》，除咗一系列惨情金曲，居然献唱关菊英经典名曲《讲不出声》，又令人谂起当年抢奖事年，乜咁大整蛊呀﹗

2009年1月TVB举行《2008年十大劲歌金曲颁奖典礼》，主持曾志伟同崔建邦宣布“年度杰出表现奖金奖”得主系关菊英，点知听到个关字，Jade就一个箭步冲出嚟接过奖项，台上台下都一面错愕。呢件劲尴尬嘅事令Jade个名以后都同菊姐剪不断理还乱。

估唔到隔咗9年后，关心妍重返电视节目，除咗唱出自己嘅金曲《放生》、《优先订座》、《你有心》，居然仲唱出关菊英经典名曲《讲不出声》﹗一边听到Jade悦耳嘅声线唱出“讲不出声讲不~出声，任由自己~半夜惊醒”，个脑都不禁浮现当年抢奖嘅画面，网友都话乜TVB咁大整蛊呀……其实《2015年十大劲歌金曲颁奖典礼》上，关心妍得奖时又遇著崔建邦做主持，接过奖座后Jade笑言“无搞错喇今次，唔使担心！”唔理系佢自己拣歌定被安排唱《讲不出声》，久休复出立即引起话题都未尝唔系件好事。