【后生仔倾吓偈】江嘉敏被指扮高窦　麦明诗唔同前辈打招呼？

TVB节目《后生仔倾吓偈》最近讲到去到陌生环境,，见到好多唔识嘅人，难免会觉得尴尬同怕丑，但系作为后辈，唔敢同人奖讲嘢真系好容易畀人误会为“寸”。其实唔讲嘢系咪就等于寸，唔笑系咪即系黑面呢？

今集嘉宾江嘉敏就提到读书时期拍摄广告，放break嘅时候通常一班演员都会一齐食饭，但因为太怕丑所以就自己一个喺角落食饭玩电话，谓：“跟住听到有监制话条女咩事，咁高窦嘅。𠮶时都好唔开心，因为我唔系因为高窦而唔同你讲嘢，我系怕丑唔知点样开话题。”江嘉敏就笑指由𠮶次开始，就喺片场最多嘢讲。

而主持之一嘅麦明诗就大呻身同感受，说：“但佢又会觉得我哋做咩要特登同你讲嘢，梗系你同我讲嘢先啦，你系后辈。我有时喺TVB化妆间有啲好高前辈嘅阿姐，我去到又唔好意思同佢倾偈，因为我惊打扰佢，跟住听讲有啲人话我好cool啰。但系我系怕丑，我唔想阻住人哋，咁我唔知人哋想唔想同我讲嘢。”