【有片】张家辉嬲爆要网民找数 ：说过渣渣辉的人都要回票给我！

要数今年张家辉最红嘅作品，唔系电影，而系“渣渣辉”广告。张家辉喺内地代言网络游戏，广告中一句：“大家好，我是渣渣辉...”被疯传，最近佢为自导自演作品《低压槽》，穿州过省到处宣传，无可避免要用国语沟通。家辉俾人笑得多睇嚟已经豁出去，呢日喺网上直播中侃侃而谈，笑住警告观众：“叫过我渣渣辉啦，那这次的电影呢也是时候掏钱啦，不要忘本啊。”

为咗宣传自己嘅作品，艺人经常要车轮式接受访问，好似张家辉呢日就喺一个网站直播，亲自回答主持人以及网友嘅问题。整个直播长约个半钟，家辉真系好落力去宣传，不过要听得明佢讲乜，都真系要相当专心，因为佢嘅港式普通话相当有个人风格，无字幕之下，其实都真系好好笑。有观众留言表示，想睇张家辉直播玩“渣渣辉”游戏，张家辉亦显得好豁达，豁出去笑住警告观众：“你们都叫过我渣渣辉啦，那这次的电影呢也是时候掏钱啦，不要忘本啊。”对比直播前拍摄嘅预告片，被网友笑称：“望住稿照读，讲嘢个表情好似被迫认罪咁。”直播中嘅普通话，都唔算太差啫。

【有片】张家辉内地广告爆红 世界级国语同古天乐有得挥？

公道啲讲句，张家辉啲普通话已经进步咗好多啦，事关有网友揾返当年佢喺第26届香港电影金像奖主持嘅片段，家辉走落台访问周杰伦，讲咗句：“周总你好”之后，就陷入一片安静，最终周杰伦讲咗句：“你讲广东话就好﹗”由此可见当年家辉连一句完整句子都讲唔出，而家可以做1.5小时直播不停讲，真系大跃进架啦。