【逆缘．专访】林夏薇为学戏放弃拍《色，戒》：我冇后悔呢个决定
无线剧《逆缘》里面“香港队长”陈家乐嘅戆直演出当然系一个亮点，但其实林夏薇扮日本妹都扮得几好睇，而为咗演得似模似样，本身唔识日文嘅佢仲两星期内日练12个钟，真系下咗唔少苦功。其实薇薇为咗演艺真系搏到尽，练学日文嚟讲只系其中嘅一小部分，佢经历过嘅辛酸绝对系好多人都唔想体验。
相信好多人都觉得薇薇家境好，出身中央戏剧学院（中戏），系章子怡、刘烨、邓超等巨星嘅师妹，又有林峰呢个堂大佬睇住，自然就可以平步青云，事实上佢系一步一步咁用自己嘅汗水同泪水去到今时今日嘅位置，唔应该单凭出身就抹煞佢嘅努力。薇薇喺访问中就话自己16岁只身到北京读书时“真系乜都唔系”：“我由细到大，屋企都系教我要靠自己，我自己一个喺北京时，我系住地下室，要靠做临时演员揾钱，试过得30蚊人工都要畀中介呃，又试过拍几日广告得100蚊。”
系咪读完中戏就一帆风顺？薇薇好记得学校老师同佢讲过，各位同学毕业后都系由零再开始：“其实中戏只系一个平台，令你接触多咗啲相对安全嘅机会，因为有好多大导演会去中央戏剧学院揾演员。”咁读书时有冇人揾过佢拍戏？佢就讲咗件好少人知嘅事出嚟：“我读大学时其实系有机会参与李安嘅《色，戒》，如果我拍，《色，戒》就系我第一套作品。不过，老师话我系一年级升二年级，唔可以出去拍戏，个角色系贯穿成套戏，同学校倾咗好耐都唔畀。老师就话如果要拍嘅就要退学，我有同学就觉得我应该退学，机会唔系次次有，但系我选择咗脚踏实地，因为我冇信心第二年再考到入中戏。我觉得中戏系好神圣，我嘅初心系入嚟求学问，读完之后再揾其他成就。我挣扎咗好耐，谂到底系我系为一个角色定系其他，最后我系拣咗继续读书。”而佢亦都冇后悔过呢个决定。
之后，薇薇就更清楚自己嘅目标，就系装备好自己，做一个真心钟意做戏嘅演员，而呢个谂法到今时今日都冇变过：“我同我同班同学陈晓仲有经常联络，佢觉得我返香港发展系啱，而佢喺北京都好拚博，遇到嘅困难都唔同，但都系向住同一个目标继续进步。我拍紧《公公出宫》时，佢打畀我，问我想未来工作系点样，问我想唔想有突破，仲建议话不如一齐放低所有嘢去跑龙套，我话都可以试下，点知我哋各自都好快结咗婚，变得有啲嘢冇办法放低，但我哋都冇放弃过追求自己嘅梦想。”而佢亦都好记得学校老师呢句说话：“佢话做人做得好，你先会学识做戏。”
发型提供：Ivan Lee @ Headquarters（林夏薇）
化妆提供：江中平化妆室（林夏薇）
服饰提供：GU Hong Kong（陈家乐）