【早霸王】内向男暗恋2个月突然表白 森美都担心：你机会唔大！
每逢一到星期五这个日子，就知道系《早霸王》表白环节《你知道唔知道有人挂住你》的时候，最期待嘅画面终于出现，今次终于系表白㗎喇，男听众就叫做阿声，佢话之前自己就又冇乜表示，就想借节目去表白，森美一听就觉得唔对路：“如果你系钟意一个人，点会一啲表示都冇？你突然之间佢会好大压力， 好难应承你，你平时同佢相处系点㗎，佢吸引你果刻系点？”
阿声一提起佢钟意嘅人就好冧猪，“佢做嘢专注个样啰，我哋一齐做嘢识嘅，有一晚做嘢大家做到好夜，咁我好攰，我望住佢对住电脑做嘢个样好专注、好靓！”斋听都幻想到个画面好浪漫，但等阵先，阿声话自己咩都冇表示过，点会咁淡定㗎？阿声就心窒窒咁话：“唔太敢，我冇乜暗示啊，系留意多咗佢，倾多咗计，都系工作上嘅嘢，未试过一齐食Lunch。”
【早霸王】养猫有车仲娶埋老婆 森美：你拥有香港人最理想生活！
我估唔止森美，大家听完都替阿声担心，识咗2个月咩都冇做过，咁突然表白失败率相当高，正常应该试探吓口风，借啲意亲近，平时睇《精装追女仔》都有教啦，再唔系“MK活地阿伦”叶念琛嘅电影都总会学到几招嘅，森美都唔放心问清楚阿声：“你睇佢眉头眼额睇佢钟唔钟意你啊，如果你行埋去佢又笑， 你同佢倾计又好雀跃，又会揾返你倾计，咁样你机会真系好细㖞，我想问点解你唔做啲嘢呢，打电话上嚟你都够胆啰！”
阿声就好努力咁谂起唯一一次触电的一刻，“𠮶日我做到好攰，咁我坐冷气位， 我又冻缩埋咗一旧，佢过嚟见到我冻就借咗件衫俾我喇。”人哋都主动借衫畀你，阿声一啲都唔识打蛇随棍上嘅，森美就教佢一招：“有时啲野你要当讲笑，好似佢借衫畀你咁，你竟话衫就唔使喇，如果有人揽住我呢就暖喇。”
听到呢到，相信大家都觉得有啲不寻常之处，但森美就仲未踢爆住，佢反而就开始说服阿声，叫佢唔好打电话去表白：“因为我觉得你个人比较内向，如果佢听完厌恶你，你接唔接受到呢个打撃先？你接唔接受到佢唔接受你？你怕唔怕被身边朋友知道，因为我觉得你唔得嘅机会大啊。”平时都系见森美去鼓励大家表白，好热血咁话有啲嘢唔做就会后悔，但今次居然咁消极，肯定系有啲嘢嘅！
好喇，大家准备花生2斤。
森美听咗咁耐都觉得好唔对路，终于敌不住好奇问阿声：“因为开头你话钟意佢专注，我都有啲疑惑嘅，因为好少男人会钟意女人好专注做嘢，通常钟意睇一个人专注做嘢都系男人嚟，我想问吓你暗恋𠮶个叫咩名呢，男仔定女仔嚟？”我谂答案系咩大家都估到喇，电话一接通，系男声嚟嘅喂，呢个阿杨就狂笑：“我平时有听开㗎，不过系今日冇听咋。”无谓晒时间，森美单刀直入问：“你依家本身有冇拍拖？你喺香港结婚有冇问题？结婚计划生几多个小朋友？”原来阿杨已经有个拍咗拖3年嘅女友，仲已经计划紧结婚，听落就应该唔系Hehe，所以为免令阿声伤心，森美首次叫停表白环节：“你有拖拍就唔好搞咁多喇，费事破坏你同另一半，有啲嘢过咗去就由佢啦，个节目你都唔好听返喇，怕你会心挂挂。”平时森美个人就最Mean最钟意食花生㗎喇，估唔到今次咁贴心照顾住阿声感受，唔紧要啦，反正冇咗棵树仲有成个森林啊。