图书馆借书排行榜日本旅游天书占首位　周奕玮：自己发掘更加难忘

现今社会都著重于网络平台嘅发展，而大家似乎对阅读嘅要求已经同过往好唔同。以前返学搭车都会见到人睇报纸同睇书，但依家个个就净系玩电话做“低头族”，根本都唔会去留意身边所发生嘅事。而今日民政事务局日前就公布咗2017年嘅图书馆借书排行榜，其中非小说类的书籍，头10位竟然有8本都系日本旅游天书，除了反映香港人的阅读品味，亦反映港人依然好钟意日本，旅游达人周奕玮接受《香港01》访问时，表示自己去旅行时，都唔会放过任何揾到旅游资讯嘅机会，谓：“所以旅游书、杂志、上网、问Friend，自己去当地撞吓探险吓，咩都会试。”

另外，讲到旅游业书嘅重要性，周奕玮就觉得旅游书系去一个地方嘅入门版，系比人对𠮶个地方有个基本概念，虽然有用，不过要识得自己过滤吓边啲真系适合自己，笑言：“同埋我觉得旅行系属于自己嘅旅程，有时适量地自己盲中中周围发掘吓会比跟足旅游书去玩更加难忘。”至于点解香港人咁钟意去日本，周奕玮话：“我觉得系日本好多元化，食、shopping、靓景、潮牌嘢、文青影街头相咩都有，而且成个日本由冲绳到北海道要海有海，要雪有雪要花有花。同埋日本人同其他东南亚地方嘅人嘅思维模式同习惯都唔一样，佢哋𠮶份专注细心嘅职人精神同待客接物都系喺亚洲地方中比较独特，去其他地方未必揾到。”

再睇吓港人都好钟意去嘅台湾，旧年台湾就阅读习惯喺网络上进行调查，发现台湾人购买书籍嘅自主性都好高，亦觉得亲自逛书店拣书比起媒体或者名人推荐更重要。而台湾人会选择嘅书类头3位，包括商业理财、心灵励志同文学小说，而旅游书都只系排第7位，年龄介乎20-29岁嘅台湾人，平均都会每月花钱购买1-2本书。另外，大部分台湾人都认为阅读嘅主要目的就系精进工作能力及视野，同时间可以增进知识同优闲娱乐。