【百万富翁】勇者仁杰同歌莉来自咩动画？　有个选择笑死现场观众

虽然曾经创下39点收视嘅《百万富翁》随住亚视翻生再度喺观众面前出现，但唔知系唔系因为冇咗大气电波嘅助力，定系因为大家唔惯主持嘅由陈启泰转咗做陈志云，所以个势真系同以前争好远。可能正正系因为咁，成个节目好似玩得放过以前，啲题目仲随时笑爆咀。最近就有网友剪辑咗《百万富翁2018》第17集其中一个参赛者嘅作答片段出嚟，而呢条问题系一条$3000嘅题目：“‘勇者仁杰与歌莉’是来自哪一套动画？”

志云大师就喺片段里面向参赛者逐一讲出四个选择，有唔少现场观众听到第一个选择“A：呖咕呖咕魔法阵”时已经笑咗出声，到大师讲完“B：咕噜咕噜魔法阵”同“C：扑通扑通魔法阵”后，佢就讲咗一个令好多人都会笑到失禁嘅选择出嚟：“D：二姑二姑魔法阵”，搞到现场观众都笑得劲大声，而我自己听完呢个选择后都真系笑到痴咗线，好彩个参赛者都真系“临危不乱”，讲出“B”先系正确答案。唔明有几好笑？我唔会喺度解释，建议问问你身边啲男性朋友。

其实第30集里面都有一条问题好正，而呢条问题会挑起一部分球迷嘅神经：“以下哪球队未获得过‘英格兰超级足球联赛’冠军？”而陈志云就提供咗四个选择畀个参赛者“A：阿仙奴”、“B：利物浦”、“C：布力般流浪”同“D：曼联”。唔知系个参赛者唔熟足球定点，佢要用“五十五十”呢个锦囊剔走两个唔关事嘅选择，最后得返“B：利物浦”同“D：曼联”呢两个答案畀佢拣，而结果真系呼之欲出，亦明显系喺“利迷”内心嘅伤口上洒盐。

但几搞笑都好，都唔会够陈芷菁同已故影星邓光荣好多年前上《名人慈善百万Show》咁经典。当时主持陈启泰就问佢哋两个“以下哪部不是莎士比亚四大悲剧之一？”，而陈芷菁就好肯定“B：奥赛罗”唔系，仲讲咗一句“我读、我读Drama架”，之后又同邓光荣击哂掌咁。到陈启泰揭晓答案系“D：罗密欧与茱丽叶”冒，陈芷菁就吓到擘大个口得个窿，劲惊讶咁问：“吓！点解呀？”而陈启泰未喺对方定神时就已经讲“八千大元！畀啲掌声！”