薛家燕豪掷四千万娶新抱　送40万龙凤鈪大过拳头

薛家燕囝囝石耀庭(Jackson)将于6月迎娶女友Zoe，家燕姐对准新抱Zoe宠爱有加，除咗过百万嘅大礼，仲送市值二千万嘅西半山豪宅畀佢哋两公婆做新居，加上洲际摆酒，据讲成个婚礼加埋要使四千万。

家燕近年投资有道，手持七个物业，总市值过亿元，同时佢亦懂得营商，继2004年创立“家燕妈妈艺术中心”，早前斥资七位数字推出自家制的“家燕妈妈曲奇”，可谓猪笼入水，系圈中富婆。所以家燕娶新抱，出手一定唔会手软，早前佢仲拉埋新抱Zoe一齐去睇金器，睇中两对巨型，加埋差不多30两，盛惠40万。

日前Zoe在IG上载过大礼嘅相，未来老公Jackson，家燕姐都有亲自出马。只见全部过大礼嘅礼盒放满钢琴同饭台，包括名贵海味、嫁女饼、利是、果篮，巨型龙凤鈪、金猪牌颈链、名表、其他金器，对龙凤鈪仲大过拳头。另外仲有一大排巨型金猪牌，约有六大只，保守估计加埋近十两，以现时金价约1.4万一两计，约值14万。寻常人家过大礼一般可能都只系几千至几万蚊，但家燕姐送嘅金器大礼加埋总值过百万。见到未来奶奶送咁多只金猪畀自己，Zoe都忍唔住话： ‘I think all those golden piggies are hinting something.”　无估错喇，家燕姐摆明想早日抱孙啦。

家燕姐一向系圈中出名嘅工作狂。早年婚姻失败，一度寻死，但谂起三个仔女，佢咬紧牙关生存落去，此后就展开佢无间断嘅工作，日以继夜咁拍剧，做空中飞人飞来飞去登台，同时亦涉足商界，管理佢嘅艺术中心同曲奇饼店。一个女人仔凑大三个儿女，咁博命打拼都系为咗佢哋。家燕姐见到仔女幸福，佢就幸福，所以使几多钱对家燕姐嚟讲唔重要，最重要系见到仔女开心。依家囝囝娶新抱，家燕姐等于多咗个女，当然要爱钖佢啦。各位准新抱，羡慕吧！