49岁张可颐Keep得好　太dry想拍拖：冇理由求其揾个

艺人张可颐今日出席自己代言嘅美容广告发布会，广告当中主角Maggie造型百变，原来今次佢除咗做主角，仲系美术指导，Maggie坦言今次系一个大胆尝试：“其实今次自己都有尝试负责呢方面嘅事情，包括造型、概念等都有帮手谂，咁都好多谢身边嘅同事帮我分担咗好多。”同时今次呢个作品面世，Maggie见到都好开心觉得好靓。但讲到长远会唔会做美术指导，Maggie就话想一步一步慢慢黎。

好多人会觉得靓女一定会斯文，好静态嘅感觉，但Maggie就有另一种睇法，因为广告中有一个造型就系Rock and Roll，Maggie透露最钟意呢个造型：“好多人成日将靓女𠮶个框框限死咗好斯文，但我觉得靓女应该系唔同职业唔同嗜好嘅女仔都可以系，所以个𠮶一日见到支电结他就灵机一触，因为Rock and Roll比人感觉好有个人风格。”

现今社会嚟讲，微调已经变左一件好普通嘅事，而好多艺人都大方承认有做微调，至于对Maggie嚟讲微调呢件事系接受，佢本人就冇话抗拒呢件事情，但若果身边有女性朋友要做嘅时候自己会首先介绍佢地用自然疗法，当然如果佢地做完微调觉得会令到自信增加，自己会以得安全为准。

上个月尾系张可颐49岁嘅生日，一直都系“工作狂”嘅佢，工作更未停过，呢轮忙完电影宣传，接落黎又要飞美国拍电，对于爱情会唔会都系今年生日愿望之一？Maggie就表明：“男朋友几时都想揾，但冇理由想揾男朋友就求其揾个男朋友，我觉得大家要夹到，缘份喺到。”