唐诗咏契哥一箩箩　认契哥系曲线收兵？　

前几日林子善结婚补摆酒，筵请63围都唔够放晒佢啲朋友，几乎成个电视城嘅人都嚟参加饮宴，仲墟冚多星过台庆颁奖礼。当中林子善嘅兄弟团相当养眼，有郑嘉颖、马国明、黄长兴、袁伟豪等等，子善话接新娘𠮶时，姊妹个个都挂住望靓仔，所以几乎系直行直过冇遇到咩困难。除咗一班型男之外，唐诗咏仲反串著上西装做兄弟，企喺成班男人之中好抢眼，诗咏仲好感性咁喺IG度祝福子善要永远幸福快乐，仲Hashtag“#铁马兄弟”，咦，乜佢哋系兄弟？

系呀，冇讲错，兄弟团入面系《铁马寻桥》嘅班底，包括郑嘉颖、马国明同黄嘉乐，佢哋3个都系唐诗咏嘅契哥，仲加埋主人家林子善，总共系4个契哥，呢件事真系相当尴尬。事关之前马国明同唐诗咏因合拍《枭雄》日对夜对之后，传绯闻传得好劲，两个人都好暧昧咁冇否认，只系叫大家畀啲空间佢，唔知仲以为真系拍紧拖，到最后佢同洪永城一齐先知原来系流料，唔通天下嘅契哥契妹都系“朋友以上，恋人未满”？有人就话认契哥系曲线收兵嘅一种，咁系大家葡萄啫，马明本身已经系个个人心目中嘅100分男神，仲要加埋218五个零嘅郑嘉颖、黄嘉乐同洪爷林子善，简直系每个女仔嘅梦想生活，净系谂吓都不得了！

如果话认契哥系收兵，咁就太傻太天真喇，以唐诗咏嘅条件真系唔需要啦，话晒都系视后又识得撒娇。不过咁，上契就唔系女仔嘅专利，好似马浚伟咁，佢仲早过唐诗咏认契妹，唔通又话佢追唔到人哋就认做契妹咩？好似大台当家花旦杨怡、陈法拉、钟嘉欣都系马浚伟经常公开承认的“大妹”、“二妹”、“三妹”，佢哋3个嘅级数都不分上下，可以拥有呢3大美人做契妹，真系夫复何求！马仔仲有句名言：“男女唔一定拍拖，契哥契妹唔一定有嘢。”估唔到平时听小学生话要招FD子，招家人，原来现实生活中娱乐圈都仲好流行呢样嘢。