同“印度刘华”齐名兼撞死过人　巨星萨尔曼汗因偷猎羚羊判5年监

讲起印度男神，我哋香港人第一时间一定系谂起有“印度刘华”之称嘅阿米尔汗（Aamir Khan），但其实仲有两个天皇巨星同佢旗鼓相当，分别系萨尔曼汗（Salman Khan）同沙鲁克汗（Shahrukh Khan），佢哋加埋仲叫做“3K”（3 Khan）添，喺Bollywood可以话系举足轻重。不过，比起其余两位男神，萨尔曼汗就具争议性好多，近年都牵涉好多单官司，最近仲因为20年前拍戏时偷猎两只受保护嘅印度黑羚而被判入狱5年兼罚款约1200港元，上庭后即时还押。

其实今次已经系1998年非法猎羚案嘅第4次指控，喺2006年嘅时候萨尔曼汗已经先后被判入狱1年同5年，但去到下一年又改判缓刑，而2016年更撤销两个指控。所以好多印度网民都估计萨尔曼汗再次上诉后，可以再次甩难。

萨尔曼汗惹嘅官非亦唔止呢单，2002年时佢就喺孟买醉驾撞死一个流浪汉兼撞伤四人。肇事后不顾而去嘅佢，喺2015年时却因为法庭认为一个已死警察畀嘅证供唔可靠，所以就判佢无罪。N次打破印度票房纪录嘅萨尔曼汗，不但获奖无数，亦系全球最高收入演员第9位，身家估计高达16亿港元。