【逆缘】夏文汐未够廿岁已系豪放女神　代表作《唐朝豪放女》坚爆

无线剧集《逆缘》又点止得“香港队长”陈家乐冰封七十年后“重生”揾亲人呢个卖点，其实未试过拍TVB剧嘅夏文汐同黎诺懿嘅忘年恋亦都系好引人入胜。大家可能都觉得成件事好冲击，佢两个年纪争足足廿年㖞，但其实呢啲咁嘅嘢对57岁嘅汐姐姐好小儿科。可能我呢啲90后对佢拍过嘅作品唔系好认识，我唯有问一问老窦睇下会唔会有多啲料，佢就话汐姐姐当年真系好犀利，直头系女神级，首部作品《烈火青春》就已经同张国荣、叶童合作，佢同汤镇业喺电车上面嘅火辣辣嘅激情场面可以话系永世难忘，但点都唔够佢𠮶套《唐朝豪放女》劲。

好快我就揾咗呢套1984上映嘅《唐朝豪放女》嚟睇，而个故事大约系咁：汐姐姐喺戏里面就饰演唐朝才女鱼玄机，佢不甘受婚姻礼教所束缚，所以出家做道姑，但见到道观内嘅女冠都系钟意锦衣华服嘅俗人，所以就睇唔过眼骑住白马走咗去。机缘巧合下，佢喺船上认识咗佢一一生最爱嘅男人“崔博侯”万梓良，仲好快就同对方翻云覆雨。不过，身为浪客嘅万梓良之后就离开咗汐姐姐继续浪迹天涯，而为咗证明自己可以好似男人咁洒脱，汐姐姐就成为咗拣客嘅名妓。最后，因为汐姐姐杀死咗自己嘅侍婢，而被官府判处斩首之刑。

当初，我真系当系普通情欲片咁睇，点知愈睇就愈唔对路，因为呢套戏可以话系Master Piece，剧情紧密劲有气氛，而成套戏系应该咁睇：用历史人物鱼玄机嘅豪放半生去包装嘅女权主义教典。套戏开始咗冇耐，汐姐姐就同佢嘅文人朋友讲点解佢会出家：“我入道门，只不过系想做一个独立自足嘅女人。”而之后佢所经历嘅嘢都系寻求独立嘅实践，包括佢同万梓良嘅一夜情、佢同侍婢“绿翘”嘅同性交合，以及喺刑场里面拒绝万梓良单枪匹马嘅营救从容就义，就算生死都要自己拣嘅情节。

有两幕我系比较深刻嘅，首先系汐姐姐同侍婢遭到一班强盗暴力对待，而呢班禽兽不如嘅人就逼佢哋两个交欢，好彩万梓良及时嚟到救咗佢哋，到万梓良想同汐姐姐“相好”嘅时候，汐姐姐一句说话就拒绝咗：“我今日唔想要男人。”所以汐姐姐喺戏里面嘅豪放并唔系讲紧乱搞男女关系𠮶种性开放，而系身为女人都可以有选择、想做乜就做乜，唔系男人话点就点嘅𠮶种前卫思想。

第二幕深刻就系佢一剑捅死婢女嘅场面。婢女曾经喺同汐姐姐交欢时讲过“我想返屋企”，当刻汐姐姐可能仲未系好明佢想讲咩，所以婢女就补多句：“我想返乡下，乡下嘅屋企。”汐姐姐好快就意识到呢个女人只系一个普通女人，寻常得令佢觉得可怜，绝对唔系同佢站喺同一阵线。曾经逼婢女堕胎嘅汐姐姐，就认定对方想结婚产子嘅谂法系一种背叛，所以就喺一个夜晚里面一剑杀死对方，喺对方死后，汐姐姐就激吻对方嘅尸体，成件事好操纵女婢操纵到上瘾嘅感觉。

明明汐姐姐喺戏里面收场唔好，但点解话呢套戏系女权教典？因为导演方令正好成功将汐姐姐嘅操纵狂、任性放大，去话畀大家听女性争取自由自决系正确嘅事，因为呢个世界真系好多随波逐流嘅女人，甘愿做社会又或者系男性嘅奴隶，但问题系唔可以太过激进，用自己把尺去度人哋未必系一件道德嘅事，做得过咗火位就只会最后引火自焚，所以咩都系要啱啱好咁。