【逆缘】殓房扮尸临记最专业　陈家乐都赞：几十岁挞一挞都大镬

撰文： 陈栢宇
出版：更新：

估唔到《逆缘》呢个伦理恩怨情仇剧都有啲令人笑到爆肚嘅剧情，喺寻晚播出嘅一集临尾𠮶几分钟“香港队长”陈家乐又好认真地做搞笑嘢。剧情就讲到辞咗之前份工嘅黎耀祥第一晚喺殓房开工看尸，点知就撞正陈家乐以为自己老婆死咗要打包上黑箱车入殓房，之后黎耀祥就目击住陈家乐“偷尸”，过程中两人推推撞撞，陈家乐仲激动到流哂眼泪，到陈家乐一嘢拉开咗个尸袋，先知袋里面唔系佢老婆而系一个唔识嘅阿伯。

寻晚《逆缘》嘅剧情就讲到陈家乐以为条尸系自己老婆，喺殓房开工嘅黎耀祥阻止佢抢尸。（电视画面）

好多网友都系讨论区话呢一幕好痴线，笑到肚痛之余，仲有啲似黎耀祥嘅“代表作品”《生化寿司》咁充满黑色幽默。不过，有网友嘅著眼点就有啲唔同，觉得扮尸𠮶个阿伯好惨，仲问要收几多钱先肯扮条尸。我好开心可以代表《香港01》为大家解答呢个问题，一位前无线临时演员带队就话如果需要临时演员扮尸，原来系要一早讲定而且要睇下有冇演员肯做。

经过推推撞撞拉拉扯扯，激动到痴线嘅陈家乐先知条尸唔系自己老婆。（电视画面）

呢位带队就咁讲嘅：“除咗要睇有冇人肯做，其实仲要畀多一半人工𠮶位肯做嘅演员。”实质啲嚟讲，以最低工资每个钟$32.5，呢场戏大约要拍四个钟咁计，佢嘅人工就应该系$32.5乘4乘1.5，即系$195，其实都唔算好多。之后佢亦都补充：“喺人工之外，我哋都要封返封利是畀𠮶个演员，但唔会多，都系硬币一个。试过有演员唔记得收，之后真系睇到𠮶啲嘢。”

以前做过临时演员带队嘅受访者就话，试过有临时演员因为扮尸后唔记得拎利市，最后见到鬼，真系信不信由你。（电视画面）

至于难唔难揾人做咸鱼？另一位前无线临时演员带队就咁讲嘅：“最紧要系唔导演唔好拣样，唔拣样嘅话会有好多唔好样、条件唔好嘅临时演员肯做。之前我仲喺TVB做，试过要揾一个女人，喺未到年初十嘅日子，要佢瞓棺材冚盖，我都系揾咗个婆婆，都系加半工，可能多50至100蚊左右。其实都好难揾，冇咩人肯喺呢啲日子做，万一真系揾唔到人，我哋呢啲做带队嘅就要局住上。”

另一位带队就话新正头揾临时演员瞓棺材唔系易，万一揾唔到人就要自己顶硬上。（电视画面）

讲返𠮶位做死尸嘅伯伯，以为佢系老婆而争佢嘅陈家乐就大赞佢好专业：“虽然争𠮶几下系用假人，但系挞落地𠮶一下系真嘅，𠮶一下佢要撑直个人，要对我哋好有信心咁一嘢瞓落去，有咩意外嘅话，几十岁人挞一挞都几大镬，好在祥哥都好专业，知道点样可以就住个伯伯。”

陈家乐就话扮尸𠮶个伯伯好专业，对佢哋好有信心先做到𠮶下挞落地嘅动作。（电视画面）

寻晚陈家乐同黎耀祥争尸嘅精彩场面：

+16