林子善婚宴劲墟冚多星过台庆　杨怡罗仲谦手拖手出现苟姑娘最省镜

林子善今日与拍拖5年的圈外老婆Kary补办婚礼，原来只打算筵席50围，但因为人缘真系好到冇朋友，加开13围到63围，因为酒店个场已经冇晒位，仲有好多朋友想嚟都未必嚟到，好似黄子华个骚咁一位难求。不过子华今晚就唔会嚟，子善话师傅今朝已经喺电话祝福过佢：“佢前排因为卖飞嘅事搞到个人好唔开心，我都有安慰过佢，之前同佢Whatsapp由两点倾到五点，佢心情都好返好多喇。其实男人之间都有爱情，就好似我同师傅咁，佢今日同我讲咗唔嚟喇，话怕嚟到唔知攞景定赠庆咁，我哋两个冇计呢啲嘢嘅。”

话林子善人缘好真系唔会错，除咗朋友多到酒店都唔够位放之外，号召力都相当惊人，TVB嘅艺人差不多系倾巢而出，好似台庆咁，例如KC欧瑞伟、吕慧仪、郭峰、陈法蓉都有嚟到，连啱啱同陆汉洋订婚嘅苟芸慧都话要嚟取经，以前大家成日都话苟姑娘个身形臃肿，今日见佢突然瘦咗几个码，苟芸慧解释系因为拍广告辛苦到瘦咗，依家呢个细码嘅苟姑娘真系冇得输！

之后有江美仪、蒋家旻、何浩文、韩玛利、小仪跟住嚟，估唔到喺呢个场个见到杨怡同罗仲谦手拖手出现，杨怡听到大家叫佢“罗太”笑到见牙唔见眼，好耐冇见过杨怡出现喺镜头前面。

跟接著有袁文杰、田鸡、敖嘉年，最搞笑就系徐荣同陈炜著系戏服赶嚟饮林子善呢餐，可以话系相当有诚意！每逢有婚宴就一定要有阿Bob同曾志伟呢两个“千杯不醉”，但阿Bob 就话自己已经收山，只会饮到5，6成，大家又信唔信？跟住仲有黄心颖、曾志伟、胡枫、胡杏儿、黄日华、王君馨、岑丽香、吴岱融、吴卓羲、陶大宇、金刚、林子聪、李思捷、陈展鹏等人出现，总之就好多人，多到数唔晒，最后连乐小姐都嚟埋就系最好嘅Happy Ending。
 

好多星，九十几张相，慢慢睇：