朱千雪感激父母管得严好家教　去男友屋企食饭例必主动执台洗碗

朱千雪 (Tracy) 出席无线big big channel活动同小朋友一齐玩游戏，提到近日有报道一个嫲嫲带孙女出街时，因为孙女扭计买糖，嫲嫲竟怒打孙女，更兜脚踢，引起网民热烈讨论。Tracy表示自己无见过人在公众地方打小朋友，但就见过一些父母好恶咁喝骂个小朋友，她都会忍唔住望一望。Tracy当然不赞成这些咁极端的管教方式，认为小朋友要从小教导，但不应吓吓打骂，一定要取得平衡。

Tracy说：“我自己父母管教好严厉，佢哋无打过我，但系喺教育我哋三姊妹方面做得好好。有啲小朋友出街食饭时喺度喊，可以带出餐厅外面畀佢企，等佢喊完先返返入去，自己细个𠮶时都系咁，唔好骚扰到人哋。我好开心爹地妈咪家教咁好，家庭教育真系好紧要，就算我依家咁大个人，佢哋都会时时提醒我，好多生活上嘅嘢例如喺人屋企食饭要帮手执台洗碗，食饭要叫人，揸筷子要揸得啱等等。我次次去男朋友屋企食饭都会主动帮手执台洗碗。”

Tracy认为小朋友从细个就要开始教，对于有些人觉得“佢哋咁细个唔识㗎，大个先教啦”，她并不认同：“唔会唔识，就算细个唔识都可以做咗先，例如要双手接嘢或者畀嘢人，我细个都唔明点解，但都做咗先，大咗自然会明自，原来咁样系尊重人同有礼貌。”她笑言父母经常对她的提点亦令她有压力要做好自己：“总之我一定唔会失礼人。”