51岁温碧霞破罗霖纪录　六月出写真开个唱骚劲骚Quali

呢个世界真系有啲人唔识老，而今年51岁嘅美魔女温碧霞（Irene）就系一个好好嘅例子。为咗等世人可以景仰到呢种不老美貌，Irene真系好有佛心，准备喺今年六月推出《海潮》写真集，之前仲去到塞班岛影落好多三点式泳装照，又有斋著底裤用被单遮身嘅火辣相，想透过呢件事畀自己一个好好嘅回忆之余，仲想话畀大家知唔好放弃自己嘅梦想，成件事真系几令人期待。谂返起之前罗霖喺50岁时都出过写真集，今次Irene真系以1岁之龄轻轻咁赢咗佢一个马鼻。

当大家以为净系得本写真嘅时候，Irene就话畀大家听好戏陆续有嚟，今日佢就喺自己微博度宣布快将举行巡回演唱会，而首站更加定喺香港，而呢个名为《温碧霞海潮演唱会2018》嘅骚，就会喺6月19日于旺角麦花臣场馆举行，票价分$480同$680两种，佢去到五月时就会专心筹备。

除咗写真集同演唱会，Irene今年仲会开拍自传式嘅新戏《我们的十八岁》，讲述自己由几岁到十几岁嘅成长经历，同老公何祖光开餐厅同花艺店不特止，亦打算推出自家品牌嘅红酒。另外，佢接受传媒访问时亦透露，同老公分居一段时间后，两人嘅感情比以前更好，又指知道养子Xavier想喺美国升学，所以自己都打算过埋美国，陪仔仔读中学，而自己就会读Art，试下过简单生活咁。