【东张西望】为五迷出头　利颖怡被职员话多事：点解打尖嘅拎筹先

对于好多人嚟讲，寻日嘅朝头早只系一个好平常嘅朝早，但对于一班钟意五月天嘅粉丝而言，却系一个好重要嘅日子，因为五月天香港骚嘅门券喺寻日嘅朝早公开发售。不过，因为黄牛党肆虐就令到呢个原本值得兴奋期待嘅日子，变得怨声载道。喺寻日播出嘅无线节目《东张西望》里面就呈现咗尖沙咀通利琴行外嘅情况畀观众睇，其中外景主持利颖怡（Joan）为五迷出头，指当初定好咗“绿色箭咀”先至系龙头，问点解照派畀龙头前排队嘅南亚裔人士，却被职员话多管闲事：“你唔系排队嘅，唔好出声。”令观众都好愤慨。

Joan接受《香港01》访问时就指其实一班黄牛党与粉丝同样在24号开始排队：“但佢哋唔系排头位，我哋问返啲同学仔（指五迷），佢哋就话班黄牛党好快就喺头位之前放咗几张纸皮喺度打尖，而啲职员就觉得打尖嘅人都系排咗咁多日，所以都应该畀筹佢哋，当咗佢哋先系真系排第一嘅人，无论佢哋系唔系打尖咁。我觉得件事真系好唔公平，当然打尖嘅南亚裔系有错，但系最大问题系职员嘅判决，明明讲好咗箭咀后先计数，点解无端端畀打尖嘅拎筹先。有人有异议，佢就话有人捣乱，话有人捣乱就唔派筹。”

Joan坦言见到呢个情况之后就忍唔住为一班五迷发声：“但其实心情都好复杂，我都好惊出咗声之后，佢真系唔派筹，搞到害咗一班同学仔，之前都有类似嘅情况发生。（职员叫你唔好多事时系咪好嬲？）我都有谂系唔系我太多事，因为同学仔都唔敢出声，我又觉得唔好再令同学仔迟咗入去，所以都唔再讲啲咩。（有冇后悔咁样据理力争？）冇，我当时就系觉得点解冇人出声先出声，唔可以咁样畀店员觉得自己系啱。”

对于黄牛党嘅问题，Joan就认为实名制系唔错嘅解决方法：“好多人都怪罪于南亚裔人士，但唔应该咁谂，因为就算系南亚裔人士、内地人、香港人又好，最大问题系打尖，今次只系咁啱系南亚裔人士。个售票制度真系出现好大问题，我哋已经同售票处职员讲佢咁安排好有问题，但佢依然好执意派畀打尖嘅人，咁真系好唔妥。”

《东张西望》片段截图：

利颖怡平时Post嘅靓相：