姜丽文斋写Kpop歌就够？　“要唱Oppa Oppa𠮶啲咪搞我”

虽然姜丽文（Lesley）都拍过唔少剧，但原来佢之前系冇拍过任何一套无线嘅剧集。今日，佢就同郑则仕、邵美琪、黎诺懿同黄智雯等喺将军澳电视广播城亮相，为梁材远监制嘅新剧试造型。问佢第一次喺TVB开剧紧唔紧张？佢接受《香港01》访问时就咁讲：“我恨咗呢个好Tight嘅Schedule好耐！反而我惊我广东话唔得、讲得唔正，所以会做足功课。（哥哥姜文杰、爸爸秦沛有畀贴士？）佢哋话我眼大，所以唔好Over-act、咩戏都用对眼做。”

佢又话逢亲拍剧都写唔到歌：“一来冇时间，二来我嘅心机同一时间只能够放喺一样嘢上。（唔理自己音乐事业？）都系拍两个月啫，16岁写到依家32岁，我仲有好多存货。（之后都仲有写咗嘅Kpop歌出？）有三首，但未透露得，只能讲歌手或者组合有男有女。”问会唔会想自己唱Kpop？佢就笑住话唔想试新嘢，作下歌就得：“我喺香港好开心，喺韩国做幕后又好开心，能够为2PM写歌、做监制已经好开心，要唱Oppa Oppa𠮶啲唔好搞我喇。”