【开心速递】John同Jenny偷情兼奸招上位　网友入戏憎到入骨　

讲的就是John (何启南饰) 和Jenny (陈伟琪饰) 喇。Jenny身为人妻但却背夫偷食，瞒住老公龙力士 (郑世豪饰) 同情夫John发展婚外情，仲使出连串阴招于公司内夺取权力地位。John同Jenny的恶行令到一班观众以及网民都睇得好投入兼好肉紧，甚至有网民开post话祝John同Jenny早日生爱滋死，大家都闹得好毒㗎。

任何人被闹仲要咁样咀咒，都一定会唔开心啦，不过何启南知道网民咁样闹他，就完全唔介意，仲话：“演呢个角色演到畀人闹都开心㗎，咁证明我哋做到个效果，先令观众睇得咁投入。现实生活中暂时就无畀人闹过，亦唔担心会畀人闹，其实我已经做咗好多呢啲角色，要担心都唔系依家先嚟担心。”至于John同Jenny之后仲有咩奸招，他说：“暂时未知，不过处境剧衰极有个谱嘅，唔会太衰，睇下编审点写落去，编审好口密，讲啲唔讲啲，我自己都好好奇。”

陈伟琪也无试过因为演Jenny一角出街畀人闹，她说：“反而系收到好多好正面嘅feedback，啲人又会走埋嚟叫我细龙太。咁喺网上畀人闹都开心嘅，即系代表我哋做到件事。启南佢教咗我好多嘢，我成日问佢意见，佢又会早啲返厂同我对戏，真系好好㗎。”她还透露Jenny之后仲有好多奸招：“例如搏同情，想大家唔好爆佢同John嘅奸情出嚟，有一集佢想炒汤盈盈，结果畀公司啲人玩得好惨，大家睇完一定会觉得Jenny都有今日喇。”

而她日前刚刚拍完第306以及307集，就是她拍剧以来的一次突破：“呢两集主要系讲Jenny同John，其中拍咗场好劲嘅喊戏，我真系喊得好凄惨，入行拍剧至今第一次喊得咁伤心，直情系喊到眼泪干晒，所以都有用眼药水，拍完返到屋企对眼仲系觉得好干。至于点解会喊到咁大家到时记得睇喇，总之Jenny对John嘅感情系真心嘅，而John对Jenny系咪真心就唔知喇。”