麦明诗旅行大派福利　半夜晒三点式出水芙蓉照

麦明诗（Louisa）最近放假，去咗苏梅岛玩，去chill点少得喺IG打卡，佢喺IG Po咗两条短片，其中一条半夜出Po，系佢夜晚喺泳池著三点式“表演”揈水发，不过系失败嘅，而且都几狼狈吓，仲被掌镜嘅阿哥麦明山以魔音取笑，不过Louisa以笑容搭够！事隔一晚，Louisa再上传一条新片，日光日白再下水表演揈水发，仲要全慢镜揈出嚟嘅水珠都清晰可见，Louisa大叫“妈我得咗喇”，唔知系咪为咗呢个出水芙蓉POST，苦练咗成晚！

虽然Louisa努力揈水发，但大家嘅注意力其实落喺佢个身材度，因为Louisa著咗件粉肉色三点式泳衣，喺朦胧嘅夜色下，身材更显澎湃，简直系深夜大派福利。而另一条片都唔嘢小，表演Headstand，虽然无成功Stand到，但拗腰双脚落地拱桥呢吓真系几坚，睇完都忍唔住赞句：“OK㖞!”

Louisa远在苏梅接受《香港01》访问就话，佢其实从来都未学过瑜珈：“纯粹系细个跳舞，同自己钟意练一啲柔软体操嘅动作，只系自己练吓练吓就做到。”睇嚟Louisa唔只文得，高难度动作都难唔到佢。Louisa仲话今次一家人出游非常难得：“我哋四个都要工作，好难得可以四个一齐请到假，加上3月24日系我爸爸嘅生日，所以就一齐嚟到苏梅岛旅行。”