【逆缘】麦玲玲批今年有喜　林夏薇未有生B计划：有就当然开心

人妻林夏薇虽然有幸福美满的婚姻生活，但好多人都觉得佢好似总系争紧啲嘢咁，就系争紧个B。今日佢出席无线新剧《逆缘》记者会时，就同“神之马壮”黎诺懿齐齐写个字畀麦玲玲批一批，当玲玲师傅见到个“明”字时，就即刻话：“有日有月，即系会仔女都有，今年、出年会有好消息。”林夏薇闻言即答诵：“承你贵言！”似乎真系好似想生小朋友咁㖞！

不过，薇薇接受《香港01》访问就咁讲：“其实冇计划，只系谂住拍完啲剧就多啲时间做其他嘢，依家仲未拍完《十二传说》，仲要返多个几星期工，冇时间到屋企有冇地板起咗都唔知。（就算你生都应该会继续拍戏啦？）未知架，唔想咁早定，好多嘢都系去到𠮶个阶段先算，我唔钟意Plan定所有嘢。有小朋友当然会开心，但以我性格应该会畀多啲时间去凑小朋友，都唔想错过小朋友成长嘅时间。”

提到薇薇堂哥林峰日前承认与拍拖五年的吴千语分手，她坦言对方没有同佢讲过感情事：“所有嘅嘢都系睇新闻、听你哋讲先知，我都系一个观众嚟，同埋我连我老公都唔系成日见！不过作为屋企人，会支持佢嘅选择，佢紧要佢开心。（有冇担心过佢唔开心？）见到面都唔觉得佢有嘢，反而佢担心我拍剧辛苦，因为我之前病咗声沙沙，‘阿妹你好攰㖞’咁。（佢冇讲新恋情呢？）私人嘢你问返佢啦！”