【逆缘】黎耀祥做风水佬呃你十年八年 嫌自己未够奸:可以再尽啲

撰文: 陈栢宇
出版:更新:

古语有云:“有黎耀祥嘅地方就会有强烈嘅戏味。”所以一班电视精都好想睇呢位三届视帝嘅演出,但等咗一年有多都仲未可以喺电视机度睇到佢嘅新剧。不过大家唔使等好耐喇,因为下个月二号佢做主角嘅无线新剧《逆缘》就会首播,而且佢仲喺剧中饰演一个贪钱奸仔风水师。

黎耀祥除咗喺新剧《逆缘》里面饰演姜大卫个仔,仲系饰演被冰封70年嘅陈家乐个孙。(江智骞摄)

谂返起祥仔对上一次演奸角已经系6年前播嘅《盛世仁杰》角色武承嗣,但佢今日就喺记者会话唔会因为中间十几次拍剧都系做忠,而令自己嘅奸味生疏:“我好钟意做奸架,我仲觉得个角色未够奸添,最后都仲系有啲良心发现咁,所以可以演得再尽啲!”

祥仔喺新剧里面为赚钱不择手段,奸味劲浓,而上次佢演奸角已经系2012年播出嘅《盛世仁杰》。(江智骞摄)

至于现实有冇做过啲做完会后悔嘅奸嘢?祥仔就话自己份人就好小心谨慎嘅,做咩都谂过度过:“可能我系细仔,好早就学识点样睇爸爸妈妈哥哥姊姊嘅眉头眼额。”但同好兄弟曹永廉、萧正楠等玩就会比较丧啲:“你窒我我窒你咁。(会窒到人哋坚嬲?)𠮶一下啰,但隔几秒再氹下就冇嘢。”

因为祥仔喺屋企里面系最细,所以养成咗细心谨慎嘅处事方式,但同曹永廉、萧正楠等玩时会释放自己。(江智骞摄)

至于仔仔黎正侨有冇试过做蛊惑嘢激到佢扎扎跳?祥仔就话自己睇得好开,甚至用“放养”嚟形容自己点教仔:“因为条命系佢自己负责返,我成日都同佢咁讲,佢做衰嘢都唔关我事,我对得佢几多年,咪得返十几廿年,佢依家喺美国读书做咩都冇所谓,但其实佢都好识谂,因为大家都系真心对大家好。”佢又笑指仔仔复活节会回港过节,因为美国读书好闷。

祥仔就话自己以“放养”方式教仔,等佢知道自己要负责返自己事,而佢个仔都好识谂、好听话。(江智骞摄)
+9