李佳芯会同男友陈炳铨嘈交？ 满分女友好硬颈：我好有主见！
撰文： 陈栢宇
出版：更新：
李佳芯（Ali）喺刚刚过去嘅一年里面真系好犀利，虽然佢未能够喺台庆颁奖礼得到视后荣衔，但就喺新加坡度得到最佳女主角奖，平时嘅表现亦赚取咗好多奖声，而佢喺寻晚举行嘅“微博之夜2017 - 香港站颁奖礼”亦再下一城，赢得“微博年度突破演员”奖项
对于得奖，Ali就觉得好兴奋、好开心，觉得往年嘅角色都带畀佢唔同嘅突破，而之后会播出嘅无线新剧《BB来了》亦好有挑战性，因为现实中冇BB要饰演一个妈妈。问几时至真系同男友陈炳铨（Danny）结婚生B，她答谓：“真系冇同佢倾过，我哋依家都系事业搏杀期，唔敢计划结婚住。”
唔讲咁远，讲下呢Pair情侣之后有冇机会合作。Ali就话好难叫得郁佢入TVB：“佢唔甘心净系做演员，佢做幕后都好强，教班、导演咁，我觉得佢入TVB系嘥咗佢！佢依家咁好好，可以同时做好多样嘢，唔系净系做演员、导演。”
Ali就话唔一定要同男友有幕前嘅合作，佢哋私下都成日有好多艺术上嘅交流：“大家睇完大家嘅演出都好有交流，佢有佢睇法，我有我观点咁。（佢才子上身狠评你演技？）佢又唔会，艺术冇话好唔好，都系处理手法嘅选择，佢唔会批评我之余都唔会批评其他人。”
至于Danny会唔会忍唔住教Ali做戏？她笑住答：“冇得教，我好有主见！我拣得一样嘢就有佢原因！（会倾到演变成嗌交？）会好激烈，但未至于会嗌交，都系因为讨论演绎方法选择上嘅问题。（大事各持己见，小事你话事？）又唔系㖞，有时收工好攰，会咩都唔想谂，问一阵食咩时，多数都系叫佢话事，我最多都系话想食辣咁。”