【有片】蔡少芬港式普通话受欢迎　观众愈听唔明愈赚钱

喺“香港艺人普通话发音”呢个范畴入面，“想节能轮胎能”嘅古天乐一定系佼佼者。不过截至近日，佢终于有自称为“渣渣辉”的张家辉呢个劲敌！但其实仲有另一位代表人物，虽则呢位朋友嘅普通话发音搞笑程度，真系拍马都追唔上上述两位，但配合埋佢嘅表情、肢体动作、声浪起伏等等，站在综艺娱乐方面去睇去听，系相当之具趣味性。佢就系蔡少芬！

喺内地人气真人骚节目《王牌对王牌》入面，蔡少芬绝对系亮相最多嘅嘉宾之一，原因就梗系佢份人搞笑得嚟唔造作，呆萌得嚟够自然嘅真性情反应啦，所以佢观众缘好好架，而其中令人印象深刻嘅就系佢嘅普通话水平，虽未到听唔明嘅程度，更唔系粤语发音读歪少少就当“煲冬瓜”嘅水准，但每每佢讲完嘢之后，大家总需要少少时间消化佢讲紧咩，甚至需要人帮蔡少芬“翻译”，当大家终于明白佢讲咩之后，就会不自觉咁笑出声，然后心谂：“哦，原来呢个意思。”

举个例，蔡少芬喺节目入面进行一个名为“拼音接龙”嘅游戏，顾名思义就系根据既定首字母联想词语，就好似要求讲出拼命首字母为“S”、“T”嘅词语，咁“失态Shi Ta”、“师太Shi Tai”、“食堂Shi Tang”等词就符合要求。蔡少芬参与游戏时好投入，亦唔觉自己嘅港式普通话有任何问题(后称港普)，就算被其他嘉宾揶揄：“你都系返埋位啦。”但蔡少芬依然好有自信：“我有勇气！”然后冲出去抢咪，讲：“S……Sh……T。”真系听到人一头雾水，然后张开口O晒嘴。莫讲话内地观众听唔明，就连讲开港普嘅香港观众都唔知佢讲咩。好彩，佢啲队友同佢相处得耐，逐渐捉到佢路，代为翻译解释：“她说的是‘石梯’、‘省台（省电视台）’、‘四胎’。”不过解释都为时已晚，裁判听唔明，一早揿咗错误制当佢错。至于观众就“叮”一声：“哦，原来蔡少芬系呢个意思。”

讲咗咁耐，或者大家都未好清楚头先究竟讲紧咩，或者未理解到蔡少芬有几搞笑，不如揿开条片睇睇，相信你最后都会笑住讲一句：“哦，原来呢个意思。”