陈滢转会加盟邵氏　想做打女回馈观众支持：愈拍愈有热情

作为一个钟意睇靓女嘅人，相信冇咩消息开心过呢样嘢，就系大家之后可以有更多机会喺睇到陈滢（Jeannie）嘅演出。点解？就系陈滢今日正式同邵氏兄弟签约，成为佢哋旗下嘅艺人，等大家可以喺电视机、戏院银幕以及网剧度欣赏佢个靓靓样。

Jeannie接受《香港01》访问时讲解点解有呢个决定：“其实我入行就系做Model先嘅，但因为近呢几年开始拍剧，就愈拍愈有热情，想未来呢几年都系Focus落做演员度，一路以嚟都收到好多人嘅鼓励，台前幕后嘅、街外观众都有，所以都想回馈佢哋支持。”

其实香港大大小小电影公司都好多，TVB本身都系一个选择，但点解最后落户邵氏？Jeannie答道：“因为我除咗拍剧，都想试下其他方面嘅嘢，我嘅目标系做一个好演员，而唔系净系一个Category嘅演员。（想拍咩类型嘅嘢？）最想做动作片，其实我系识打拳架！”

至于同旧公司Starzpeople系咪好嚟好去？Jeannie就咁答：“其实系好唔舍得，Starzpeople系我嚟香港嘅第一间公司，亦都系我第一份正职，喺度已经有八年时间，所以走𠮶阵都有喊。老板真系好锡我，知我香港冇人冇物，所以对我特别好，真系好似我香港嘅爸爸咁，当我有呢个谂法时，佢都好明白好支持我。（乐易玲话识你爸爸好耐你讲紧呢个爸爸？）系呀，佢咁讲我都吓一吓，哈哈！”