姜皓文演跨性别人士　感谢老婆包容：大胆到偷老婆底裤著

TVB嚟紧除咗有《白色强人》、《多功能老婆》、《法证先锋IV》等新剧，更加有同大陆媒体合作拍摄嘅《宫心计2深宫计》、《铁探》、《再创世纪》同《冲上云霄2020》，相信观众都继续好似依家咁目不暇给，当中嘅《铁探》更请到惠英红同姜皓文（黑仔）两大好戏外援帮手演出，令观众好期待。

首次拍无线剧嘅黑仔今日就有出席无线搞嘅发布会，佢接受《香港01》访问时就指自己感受好深：“好大感受，始终系第一次。其实真系好想‘入屋’，因为电视同电影真系两班观众嚟，我入油、坐的士时，啲人就会问我几时有嘢拍，我话我拍紧戏呀，佢哋就话不如拍下剧，所以都想照顾埋呢班观众。”

问有冇担心过拍TVB剧会好辛苦？黑仔都认为拍剧会赶啲：“但系享受时间又会长啲，我预咗辛苦，因为依家拍戏都唔系话好舒服。”身为第二男主角的黑仔在戏中就饰演一个亦正亦邪的探员，在家庭、工作上都有好惨的经历：“呢啲角色真系冇试过！”

提到《铁探》中Man爆的黑仔在新戏《翠丝》中却是跨性别人士，他坦言有担心过海报太Over：“我初头好抗拒，但同完啲同事以及跨性别人士倾偈后，个想法就唔同咗，因为每一个跨性别人士背后都有好辛酸嘅故事。”

至于老婆点睇佢拍呢套戏？黑仔就话对方好迁就他，知到他拍这套戏好大压力，畀好多私人时间同空间佢：“有一期好钟意剃脚毛滑溜嘅感觉，甚至大胆到偷老婆底裤著，会著透视衫落街买奶茶，睇下啲人点睇我，有啲人当冇嘢，有啲就以为拍嘢，又会咁著去大埔旧区畀啲阿公阿婆睇，佢哋会指指点点咁。（做男人开心啲？）都唔系，做女人好多花臣嘢，Bra、内衣又好多种。”