【多图】2018TVB艺员照出炉　黄心颖突发性感开胸：可能灯光问题

记得上年无线高层乐易玲WhatsApp讯息流出，下令公司女星唔可以有卖弄性感镜头，“禁色令”一出，女艺员个个都包到实一实，收起个Body，平时Facebook或者Instagram晒相都会收敛一啲；另一方面，剧集都有“减甜”配合，好似《溏心风暴3》入面黄宗泽揽女18禁场面会用黑幕遮蔽，就连明明以性爱做题材嘅剧集《性在有情》都要变成教育电视，20集都被人Cut咗做18集，唔通连睇电视都要“被过滤”？

而早前内地微博发布咗2018最新艺人照，就好似证件相咁，一人一张，个个都Set晒头，著到好似去见工咁。高海宁亦罕有收起骄人身材，改走斯文气质路线，个个都正正常常，去到黄心颖突然一转画风，冇啦啦著咗件See-through，仲要开胸开到落肚，性感到不得了，呢套战斗衫应该摆系台庆著，而唔系放做证件相㖞。

辑相出街之后，黄心颖自己都吓一吓，佢喺Facebook上面话：“听闻呢张系2018新的艺员照片、自己都唔记得有影过……”乜咁大整蛊，不过唔好理，大家有靓相睇就得啦，事后《香港01》问返心颖究竟系咩一回事，点解突然玩性感呢？黄心颖自己都一头问号：“𠮶件衫系拍月历嘅时候拣，𠮶阵时骤眼睇系冇咁透嘅，影出黎可能系灯光问题，冇咩特别Preset系咁。冇乜所谓啊，其实我都唔知佢张相系用嚟做咩，通常佢哋张相都唔系点用。”