【好大胆】焗古天乐合唱《男朋友》　J.Arie：人生有咩癫得过咁

人一世物人世，可以不顾一切同班朋友疯狂一番，将来谂起都绝对系美好回忆。呢晚电影工作者总会春茗于尖沙咀举行，J.Arie、小肥、王梓轩等担任表演嘉宾上台献唱助庆，其中一首曲目竟然系应届演艺人协会会长古天乐，当年嘅经典金曲《男朋友》！好大嘅胆呀！

今年初古天乐当选最新一届演艺人协会会长，肩负维护艺人嘅重任，佢除咗系演员，仲系电影公司及经理人公司老板，当然啦大家绝对唔会忘记，佢曾经仲系一位歌手。呢日电影工作者总会春茗上，J.Arie、小肥、王梓轩等担任表演嘉宾，本身唱紧《月亮代表我的心》，唱到中段王梓轩话：“古会长喺边呀？呢首歌系佢唱架噃，欢迎呢首歌嘅原唱，古生。”

唔知呢一Part系咪事前有彩排过，古天乐听到佢地叫名，就喺席间起身行上舞台拎起支咪。点知，一上到台《月亮代表我的心》音乐就停，再响起时就变成“回答我可不可以暂时让我讲出感觉后……”古仔个表情瞬间凝固，本身好近口边嘅咪缓缓放低，眼神望住唱到好high嘅几位似笑非笑，真系心都寒埋。几位歌手愈唱愈high仲叫大家“Push your hands up”，古仔敌唔过盛意拳拳最终都唱咗两句。

事后王梓轩上载短片留言话：“有请 #杀破狼贪狼 主题曲 #月亮代表我的心 及经典歌曲 #男朋友 原唱 #古天乐 先生上台！！”而J.Arie激动表示：“人生有咩癫得过，喺古天乐古先生面前，大大声声唱佢既金曲《#男朋友》好爆......真系好爆，因为从来冇人够胆系佢面前唱多谢我既No.1偶像古生！！！”更上载一张合照，睇嚟真系相当尽兴。