被前辈叫江X敏好尴尬　江嘉敏睇得开：呢个名帮咗我好多

江嘉敏 (Kaman) 凭住青春无敌加上甜美样子再加清纯气质，成为新一代女神，于2017年更成为Google年度热爆搜寻榜女娱乐名人第一名，已经唔知有几多网民曾在网上输入过江嘉敏呢个名喇。不过原来Kaman曾经因为自己呢个名而唔开心，她说：“本来叫嘉敏无咩特别，但咁啱我姓江，啲人会帮我改花名，江嘉敏，江嘉敏，叫叫下就变咗江X敏，连TVB啲前辈见到我都会咁叫我“hi，江X敏！”我以前细个都会有少少唔开心，会有啲尴尬，但依家真系觉得呢个名其实帮咗我好多，令人更加记得我。”至于江X敏中的X系咩，记者应Kaman的要求不写出来，请大家自行想象。

另外提到她早前在菲律宾拍摄无线新剧《兄弟》时在酒店房见到曱甴，Kaman话自己真系好惊曱甴，将来的男朋友一定要唔惊曱甴先得，又试过因为屋企睡房出现曱甴而出厅做厅长。如果大家见到她身边出现曱甴而她不知道，就唔好话给她知：“我宁愿无眼屎干净盲，𠮶次喺菲律宾拍剧时就试过有只手掌心咁嘅曱甴喺我身后，工作人员都唔敢话我知怕吓亲我，事后先同返我讲。”

她甚至试过因为曱甴而失去拍戏机会：“我casting𠮶时知道要同甴曱做戏，场戏系要瞓喺浴缸度再放啲曱甴入去同我一齐，我听到已经好惊，真系唔得，虽然无咗个拍戏机会都好失望，但自己真系克服唔到。”咁个场面的确系好恐怖嘅。