【金宵大厦】剧情要突破过《降魔的》 编审罗佩清：有曼德拉效应
撰文： 黄梓恒
出版：更新：
《金宵大厦》新剧今日举行拜神开镜仪式，焦点除了集中在陈山聪第一次做男主角之外，《降魔的》编审罗佩清也是重点之一，事关《降》剧上年好评如潮，大家都觉得个故仔十分之有意思。不过今次《金》剧有别于《降》剧，因为不是放在黄金时段播放，而是放在星期日的炮灰时段。
不过如果是一套好剧，放在朝早六点一样会有人睇，关键在于好与不好，罗佩清说：“每个单元故事都有一条主线串连住，系一套现代《七十二家房客》但有科幻奇幻元素，主线系前世今生嘅故事，会讲梦、寓言、自然力量，会有曼德拉效应，有UFO，会好似《智能叛变》咁。每个单元都有独立故事，都有自己特色嘅奇幻色彩，不过就唔同《降魔的》，系无妖魔鬼怪嘅，今次系比较接近卫斯理𠮶种奇幻，集中香港地道嘅故事，会有讯息想带出，系一个新嘅尝试。”哗，又《七十二家房客》又《智能叛变》，真系好想佢即刻拍完即刻有得睇。
不单止这样，她还表示今次直程要借镜英剧《黑镜》：“唔同于《降魔的》，今次系单元剧，如果《降魔的》系有实验性质，呢套个实验性系更加强。我无特别去谂有咩最爆，大家编剧围内度啲最有共鸣嘅故仔，例如高海宁嘅故仔系讲校童抑郁，有个系讲香港社会对女性美嘅追求，例如瘦同整容呢啲。我哋谂个格式系有啲似英剧《黑镜》，每个故事本身唔复杂，但系就想玩得极端啲同尽啲，将个讯息带出嚟。算系港版《黑镜》，但我哋未去到好科技，始终香港人未必适应呢啲元素，所以要摆返多啲本地因素，希望大家睇得有共鸣。”希望今次编审可以将《降魔的》嘅好评带落呢套剧，大家继续期待喇！