【情人节】袁文杰拍拖七年霸气第一次送花　女友张洁莲感动到喊

撰文： 洪晓璇
出版：更新：
袁文杰张洁莲不时于网上放闪晒恩爱。（袁文杰Facebook）

网上有唔少人分享激嬲女友小故事，好多时都因为女仔口不对心，男仔听到口𠮶句又估唔到心𠮶句，咁咪出事啰。由田蕊妮主持嘅情人节特备节目《1+1的深情》，第一集揾来袁文杰张洁莲担任嘉宾。原来佢地拍拖七年嚟，袁文杰都未送过花俾Jacqueline﹗

袁文杰张洁莲原来已经拍拖七年，随住去年凭游生一角爆红，令佢地不时有情侣档合作机会。（袁文杰Facebook）

袁文杰去年凭住《不懂撒娇的女人》霸气游生一角爆红，除咗佢自己工作机会大增，连带佢嘅感情生活都被受注目，亦喺呢个时候大家先留意到，佢女友正正系细个日日睇儿童节目都见到嘅Jackeline姐姐张洁莲﹗佢地两个当年分属唔同电视台，第一次见面原来都系劲老套嘅情节 --- 朋友介绍，Jackeline妹妹车车安排佢地认识。

呢一张沙龙照，就系令袁文杰一见倾心，决定要出手追求嘅契机。（影片截图）

节目中佢地由相识经过倾到二人嘅小秘密，唔好睇袁文杰牛高马大昂藏七呎，拍拖去睇恐怖片惊嘅居然系佢自己：“我又要睇又要惊，一睇到恐怖位就会挨住佢，系咁话好恐怖呀﹗”Jackeline都不禁笑言每次见到男友好似小朋友咁撒娇，都会觉得好好笑。

有边个会估到，足足189cm高嘅袁文杰居然会有撒娇一面。（影片截图）

拍拖七年，袁文杰居然从未送过花，佢望住Jacqueline好疑惑又压低声量咁话：“你好似讲过唔使……”换来女友一句：“咩呀我无讲过呀﹗”田蕊妮衬机会带袁文杰到买花，于摩天轮附近拍摄时，趁Jacqueline不为意，袁文杰同一队LIVE BAND于流动展览车上深情唱出《追》，唱完之后更加送上七年来第一札花，令Jacqueline又惊又喜，流下幸福嘅眼泪，不禁话：“平日两个人一齐佢一定唔会唱，有啲嘢平日唔做，忽然见到佢咁，真系会好感动架。”男士们记得学嘢啦﹗

袁文杰为女友送上意外惊喜，于摩天轮高歌一曲《追》。（影片截图）
系感动嘅眼泪呀﹗（影片截图）
又唱歌又送花，女主角仲感动到喊，难怪外界误会袁文杰求婚啦。（影片截图）
+4