【早霸王】女友嗌分手挽留失败 森美一语中的： 要知自己错咩！
每逢一到星期五这个日子，就知道系《早霸王》表白环节《你知道唔知道有人挂住你》的时候，今日有个男听众叫做“阿豪”，今次佢打上嚟就系想同女友箍煲嘅，森美即时就叫佢唔好讲咁多嘢，直接入正题：“你唔好讲其他啦，你激嬲佢啲咩嘢先，咩事要箍煲，你做错咩事？”阿豪就口窒窒咁话成搞到女友唔开心，但分手总有导火线，到底系咩事呢？阿豪就谂返起：“应该系今年年尾同佢去旅行，咁夜晚同佢瞓，我鼻鼾太大佢瞓训唔到，我唔知系闹佢定掴佢，之后佢就冇同我讲过野喇。”
【早霸王】男仔成日被嫌幼稚唔成熟 森美教路：有计划要讲佢听！
闹女朋友同掴女朋友分别好大㖞，究竟阿豪系做咗边样啊？“我冇问过佢啊， 唔敢问，有时做错嘢都唔敢同佢讲对唔住，佢真系咁样都忍左我几年。佢之后同我出多次街，跟住就冷战到Message都冇喇，直到上星期一同我讲分手，我都有Message同佢讲祝佢幸福。”相信大家同森美一样都唔明点解阿豪唔道歉呢？阿豪就话同女友由2014年拍拖，都拍咗3年几，算系唔短嘅日子，但阿豪就对自己好冇信心：“祝佢幸福，因为我觉得自己唔可以带俾佢未来。”
做男人最忌冇自信，森美即刻喝停佢：“你穿越嚟架？有明天你就有未来架啦， 点解你睇低自己啊？有冇未来你要自己谂，你要定目标畀自己，有边个定到目标就一定做到？冇信心令女仔要分手你唔敢挽回，掴佢一巴你都唔敢道歉！”
阿豪听完都仲系好自卑，佢形容如果100分系满分，自己连10分都冇，森美就安慰佢：“你7分都系进步，系你SET得个目标太高，太心急容易放弃，就会觉得自己冇用，你想追返人肯定要改变，起码女朋友最唔钟意你果几样嘢你要改，你唔知自己错咩，改唔到就永远都错！”
森美都讲到咁明，阿豪都有小小开窍：“最简单就系睇医生 帮我解决鼻鼾，仲有就系买唔到楼，上唔到楼。仲有其实我做药房最好就读返个Degree，我依家都系个High dip仔嚟，之前我话冇钱就冇报，但依家就储咗少少钱，打算再读。”森美纠正阿豪负面思想：“唔系一定要买楼嘅，唔系买楼先代表上进，我好多朋友就算有钱都未必买楼，个脑唔好净系放层楼喺度，有啲嘢你可能觉得自己未必做到，但过程好重要！”最后森美就帮阿豪打畀前女友恩咏，阿豪跟足晒Step去承诺女友会改过，会睇医生会读书，诚恳到森美听到都眼湿湿，恩咏就婉拒话：“你畀啲时间我啦。”，可惜感情呢家嘢，过咗“修补期”就好难再回到过去。